“Müalicə alan məktəbyaşlı uşaqların distant təhsili” layihəsi çərçivəsində Bilik günü keçirilib | Eurasia Diary - ednews.net

20 Oktyabr,


“Müalicə alan məktəbyaşlı uşaqların distant təhsili” layihəsi çərçivəsində Bilik günü keçirilib

Cəmiyyət A- A A+

Sentyabrın 16-də B.Eyvazov adına Elmi-Tədqiqat Hematologiya və Transfuziologiya İnstitutunda “Müalicə alan məktəbyaşlı uşaqların distant təhsili” layihəsi çərçivəsində yeni tədris ilinin başlanması münasibətilə Bilik gününə həsr olunmuş tədbir keçirilib.

Eurasia Dairy AZƏRTAC-a istinadən xəbər verir ki, layihənin məqsədi xüsusi ehtiyacı olan uşaqların fasiləsiz və keyfiyyətli ümumi təhsil almaq hüququnun təmin edilməsi, həmçinin leykemiya xəstəsi olan uşaqların cəmiyyətə inteqrasiyasına dəstək vermək, onların informasiya-kompüter texnologiyaları biliyinin artırılmasına nail olmaq və potensiallarını nümayiş etdirmək üçün şərait yaratmaq məqsədi daşıyır.

Tədbirdə Elmi-Tədqiqat Hematologiya və Transfuziologiya İnstitutunun direktoru, tibb üzrə fəlsəfə doktoru Zöhrə Əlimirzəyeva öz çıxışında qeyd edib ki, leykemiyalı uşaqlar il ərzində bir neçə dəfə müalicə olunur və həmin dövrdə uşaqların təhsildən kənarda qalmaması üçün Heydər Əliyev Fondunun vitse-prezidenti Leyla Əliyevanın təşəbbüsü, Təhsil Nazirliyi və Səhiyyə Nazirliyinin dəstəyi ilə “Nobel-T” şirkətinin həyata keçirdiyi “Müalicə alan məktəbyaşlı uşaqların distant təhsili” layihəsi həmin problemin aradan qaldırılmasına xidmət göstərir. Onun verdiyi məlumata görə, müalicə alan və distant təhsilə qoşulmaq istəyən şagirdlər üçün hər cür şərait yaradılıb, onlara təhsil verilməsi üçün müvafiq İKT avadanlıqları ilə təmin edilib, müəllim, şagird və valideynlər üçün təlimlər təşkil olunub. Dərslərdə ümumilikdə elektron resurslar, elektron dərsliklər və video dərslərdən istifadə edilir.

Tədbirdə Təhsil nazirinin müşaviri Nigar Bağırlı, Təhsil Sisteminin İnformasiyalaşdırılması İdarəsinin rəisi Vüsal Xanlarov, Səhiyyə Nazirliyi Tibbi Yardımın Təşkili şöbəsinin baş məsləhətçisi Aynurə Zeynalova və başqaları çıxış edərək layihə çərçivəsində keçilən dərslərlə yanaşı musiqi, texnologiya və təsviri incəsənət dərslərinin də həm distant, həm də canlı keçirilməsinin uşaqlarda müsbətə dəyişikliklərə səbəb olduğunu bildiriblər. Qeyd olunub ki, stasionar xəstələrlə bərabər eyni fənlər ambulator xəstələrə də tədris edilir və bu, onların təhsillərinə müsbət təsir göstərir, analizlərinin cavabını gözləyərkən gərginlik, əsəb yaranmasının qarşısını alır və əhval-ruhiyyəni normal saxlayır.

Sonra təhsildə fərqlənənlərə tərifnamələr və müxtəlif hədiyyələr təqdim olunub.

Yeni dərs ilinin başlandığını bildirən zəng çalınıb.

Tədbir iştirakçıları leykemiyalı xəstələrin əl işlərindən ibarət sərgiyə tamaşa ediblər.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...