Bu gün ölkəmizin hər yerində olduğu kimi Bakı şəhəri 49 saylı məktəb-liseydə də “Bilik günü” qeyd olunub.
Eurasia Diary xəbər verir ki, məktəbin direktoru Təhminə Əsədova tədbirdə iştirak edən şagirdləri, valideynləri və müəllimləri yeni dərs ilinin başlanması münasibətilə təbrik edib, onlara xoş arzularını bildirib. Direktor həmçinin birinci sinifə qədəm qoyan şagirdləri də təbrik edib, onlara məktəbi və müəllimlərini sevməyi arzulayıb. T.Əsədova əminliklə vurğulayıb ki, bu gün məktəbə ilk dəfə qədəm qoyan şagirdlər təhsildə daha böyük nailiyyətlər qazanacaqlar.
Tədbirin sonunda birincilər üçün ilk zəng çalınıb və onlar sinif otaqlarına daxil olaraq müəllimləri ilə tanış olublar.
1 ç sinfinin müəllimi Aytən Cəfərova şagirdlərini bir-bir qarşılayaraq onları salamlayıb və partalarda əyləşdirib. Daha sonra A.Cəfərova şagirdləri və onların valideynlərini təbrik edib: “Əziz şagirdlər, qədəmləriniz mübarək olsun. İlk növbədə sizin hər birinizə sağlamlıq arzulayıram. İstərdim ki, məktəbi sevəsiniz, dərslərə həvəslə gələsiniz. Çünki məktəb sizə bilik verəcək. Sizin hamınıza uğurlar, dərslərinizdə müvəffəqiyyətlər arzulayıram”.
Sonra 1ç sinfinin şagirdi Turan Aslanın atası Aqil Aslan çıxış edərək birinci sinifə qədəm qoyan uşaqlara öz arzularını çatdırıb:
“Oğlumun timsalında bütün uşaqları və onların valideynlərini təbrik edirəm. Arzum budur uşaqlarımız sağlam, zehinli, bilikli olsunlar. Ola bilər ki, hansısa şagird dərslərində zəif olsun. Ancaq ən vacib məsələ uşaqlarımızın məktəbdə şəxsiyyət kimi yetişməsidir. Aytən xanımdan xahişim odur ki, ilk müəllimi kimi bu şagidrlərin faydalı vətəndaş kimi yetişməsi üçün öz bilik və bacarıqlarından istifadə etsin. Uşaqlar bizim gələcəyimizdir. İstərdim ki, uşaqlarımız savadlı və vətənpərvər olsunlar, dövlətimizi, bayrağımızı sevsinlər”.
Daha sonra uşaqlar məktəb, müəllim, vətən haqqında şeirlər söyləyiblər.
Biz də öz növbəmizdə bu gün məktəbə qədəm qoyan bütün birinciləri təbrik edir, onlara gözəl məktəb illəri, gələcəkdə seçdikləri peşələrin "birinciləri" olmağı arzulayırıq.
Vəfa Vəliyeva
