Tələbə Qəbulu üzrə Dövlət Komissiyasının ilk sədri Vurğun Əyyub sağdır.
Eurasia Diary xəbər verir ki, bu açıqlama ilə feysbukda V.Əyyubun fikirdaşlarından olan Ellada Məmmədli çıxış edib:
"Hal hazırda Vurğun bəyin həkimi Adil Qeybulla ilə danışdım. Vurğun bəy sağdır. Səhhəti ağırdır . Xahiş edirəm ölümü haqqında doğru olmayan məlumatları yaymayın. Nəzərə alın ki, həmin statusları Vurğun bəyin ailə üzvləri oxuyur və çox həyəcanlanırlar…”.
Qeyd edək ki, bir qədər əvvəl feysbuk sosial şəbəkəsində V.Əyyubun vəfatı barədə məlumat yayılıb. Bundan öncə V.Əyyubun komaya düşdüyü bildirilirdi. V.Əyyub uzun müddətdir onkoloji xəstəlikdən əziyyət çəkir.
Qeyd edək ki, Vurğun Əyyub 1957-ci ildə Tovuz rayonunun Aşağı Quşçu kəndində anadan olub.
1992-1993-cü illərdə Tələbə Qəbulu üzrə Dövlət Komissiyasına (TQDK) rəhbərlik edib. 15 noyabr 1992-ci ildə ilk dəfə test üsulu ilə rüşvətsiz tələbə qəbulunun keçirilməsini təmin edib. Bu islahatı 100% ədalətli təşkil etməklə Vurğun Əyyub AXC-Müsavat hökumətinin ən böyük tarixi ugurlarından birini gerçəkləşdirib. 1992-ci ildən Müsavat Partiyası Bərpa Mərkəzinin üzvü, 1997-ci ildən partiyanın Baş katibi olub, 2001-ci ilin may ayında keçirilən 6-cı Qurultayında partiyanın nizamnaməsindəki dəyişikliyə uyğun olaraq katiblik müavinliklə əvəz olunub və V.Əyyub Müsavat başqanının 1-ci müavini təyin edilib.
2014-cü ilə Müsavatda rəhbərlik dəyişəndən sonra V.Əyyub partiyanın Məclis üzvlüyündən çıxarılıb və sıravi üzv kimi qalıb. 2015-ci ildə Vurğun Əyyub tanınmış iqtisadçı Qubad İbadoğlunun rəhbərlik etdiyi Azərbaycan Demokratiya və Rifah Hərəkatı sədrinin 1-ci müavini seçilib.