Daxili İşlər Nazirliyi Göygöldə 5 nəfərin ölməsi ilə nəticələn yol-nəqliyyat hadisəsi ilə bağlı məlumat yayıb.
Nazirliyinin mətbuat xidmətindən verilən məlumata görə, sentyabrın 27-də saat 23 radələrində Göygöl rayonunun Quşqara kəndi ərazisində Bayram İbrahimzadə idarə etdiyi “VAZ-2107” markalı avtomobili qarşıda gedən Ağsu rayon sakini Ş.Bədəlovun idarə etdiyi “Mercedes” markalı yük avtomobilinə vurub.
Nəticədə B.İbrahimzadə və sərnişinləri - Zamiq Mahmudov, Qüdrət Atakişiyev, Tural İbrahimov və Oruc Hüseynov hadisə yerində ölüblər.
Göygöl RPŞ tərəfindən araşdırma aparılır.
***
Ağsu rayonunda ağır yol qəzası baş verib.
Eurasia Diary-nin məlumatına görə, hadisə Ağsu-Kürdəmir yolunun 14-cü kilometrliyində baş verib.
Ağsudan Kürdəmir istiqamətində hərəkətdə olan 1962-ci il təvəllüdlü Mayılov Vaqif Dövlət oğlu idarə etdiyi 10 GP 275 dövlət nömrə nişanlı "VAZ 21074" markalı avtomobillə əks istiqamətdən gələn 1995-ci il təvəllüdlü Hacalıyev Vahid Hacalı oğlunun idarə etdiyi 31 BE 962 dövlət nömrə nişanlı "VAZ 21074" markalı avtomobillə toqquşub.
Hadisə nəticəsində V.Mayılov və sərnişinləri, 1986-cı il təvəllüdlü Qüdrətli Şahin Nəsrəddin oğlu, 1961-ci il təvəllüdlü Əmirova Şəla Osman qızı, digər sürücü Vahid Hacalıyev və sərnişini, 1967-ci il təvəllüdlü Səfərova Zeynəb Musa qızı ağır bədən xəsarətləri ilə Ağsu rayon Mərkəzi Xəstəxanasına yerləşdirilib. V.Hacalıyev xəstəxanada dünyasını dəyişib.