Türkiyə Azərbaycana dekorativ ağac ixracına başlayıb.
Eurasia Diary Türkiyə mətbuatına istinadən xəbər verir ki, artıq Ərzurumda yetişdirilən bəzək bitkilərinin ilk partiyası Naxçıvana yola salınıb.
Türkiyənin kənd təsərrüfatı və meşəçilik nazirliyinin Ərzurum nümayəndəliyinin rəhbəri Osman Akar bildirib ki, Ərzurumda yetişən, bölgənin iqliminə uyğunlaşdırılmış 20 növdə 1035 bəzək bitkisi Azərbaycan küçələrini bəzəyəcək: "Ərzurumda çoxlu bəzək bitkiləri istehsal olunur. Buranın coğrafi mövqeyi və təbii sərvətləri mövcud bitki florasının ixracına imkan verir. Tozağacı, ağcaqayın, küknar, palıd, müxtəlif iynəyarpaqlı ağaclar da daxil olmaqla təxminən 20 növ müxtəlif ölçüdə 5-15 yaş aralığında 1035 ədəd bəzək bitkisi ilk olaraq Naxçıvana göndərilib. Ərzurumda yetişən və hazırda adaptasiya mərhələsini keçirən digər bəzək bitkiləri qonşu ölkələrin küçələrini bəzəyəcək", - O. Akar deyib.
“Bahar” Tingçilik Təsərrüfatının sahibi Şaban Bahar da bölgəyə uyğun bəzək bitkilərinin istehsal etmək və onu mühitə uyğunlaşdırmağın çox zəhmət tələb edən iş olduğunu deyib. 20 ildir ki, dekorativ bitki tingləri yetişdirməklə məşğul olduqlarını deyən Ş. Baharın sözlərinəgörə, indiyə qədər 2 milyon kv metrdən çox əraziyə ağac əkiblər.
“Bizim əsas işimiz keyfiyyətin qorunmasına və inkişafına töhfə verəcək araşdırmalar aparmaq, bəzək bitkilərinin müxtəlifliyini və istehsalını artırmaq, ixracat yolu ilə ölkəyə valyuta daxilolmalarını təmin etməkdir. Birinci mərhələdə ixrac olunan dekorativ bitkilərdən 29 min 421 dollar qazanc əldə etdik. Danışıqlar və görüşlərdən sonra bu məbləğ bir qədər də artacaq”,- Ş. Bahar deyib.
Təsərrüfat sahibi həmçinin qeyd edib ki, ixracla bərabər, ölkə daxilində də ehtiyac olan yerlərdə dekorativ bitkilərə olan tələbatı ödəməyi hədəfləyiblər. (virtualaz.org)