Eurasia Diary-nin xəbərinə görə, bu barədə Goranboy RİH-dən məlumat verilib.
Bildirilib ki, Prezidentin müvafiq sərəncamına əsasən, Meliorasiya və Su Təsərrüfatı ASC tərəfindən Goranboy rayonunda torpaq sahələrinin suvarma suyu ilə təminatının daha da yaxşılaşdırılması və yeni suvarılan torpaqların istifadəyə verilməsi və Şəmkir maşın kanalının üçüncü növbə çəkilşinin aparılması məqsədi ilə müvafiq sənədləşdirilmə işlərinə başlanılıb.
Bununla əlaqədar olaraq Goranboy rayon İcra Hakimiyyəti və Meliorasiya və Su Təsərrüfatı ASC ilə birgə müvafiq torpaqayırma komissiyası yaradılıb.
Komissiya və işçi qrupu tərəfindən layihə altına düşən torpaq sahələrinin torpaqayırma sənədlərinin işlənilməsi və həmin torpaq sahələrinin mülkiyyətçiləri ilə mövcud qanunvericiliyin tələbləri və ictimai maarifləndirmə əsasında söhbətlər aparılacaq.
İcra Hakimiyyətindən bildirilib ki, dövlət başçısının Goranboy rayonuna göstərdiyi bu xüsusi diqqət və qayğısının əməli nəticəsi olaraq, bu proses başa çatdırıldıqdan sonra, rayonda əkinə yararlı torpaq sahələrindən səmərəli istifadə imkanlarının artmasına və kənd təsərrüfatı sektorunun daha da sürətlə inkişafına geniş zəmin yaranacaq:
“Bununla da əlavə olaraq, rayonun Veyisli, Rəhimli, Şahməmmədli, Qarasüleymanlı, Səfikürd, Abbasqulular, Nərimanlı, Balakürd, Qızılhacılı, Aşağı Ballıqaya, Yeniyol, Təhlə, Xan Qərvənd və Əlirzalı ərazilərində suvarma suyuna olan tələbatın ödənilməsinə və bu sahədə mövcud problemlərin maksimum həllinə nail olunacaq”.