Beynəlxalq Avrasiya Mətbuat Fondunun (BAMF) Tərtərdə yerləşən Peşə Təlim Mərkəzində Yeni il və Dünya Azərbaycanlıların Həmrəylik Gününün qeyd olunmasına həsr olunmuş tədbir keçirilib. Tədbir BAMF-in, Qızıl Aypara Cəmiyyəti Tərtər rayon bölməsinin və Əmək və Əhalinin Sosial Müdafiəsi Nazirliyinin birgə həyata keçirdiyi "Əlilliyi olan uşaqlar üçün icma reabilitasiya mərkəzlərinin təşkili" layihəsi çərçivəsində təşkil edilib.
Eurasia Diary xəbər verir ki, tədbirdə Tərtər Rayon İcra Hakimiyyətinin başçısı Müstəqim Məmmədov, rəhbərin müavini Elvin Umudov və Qızıl Aypara Cəmiyyətinin sədri Etibar Heydərov və digər rəsmilər, ƏƏSMN-nin dəstəyi ilə yaradılmış Əlilliyi olan uşaqlar üçün İcma Reabilitasiya Mərkəzi təmsilçiləri, uşaqlar və valideynlər iştirak edib. Tədbirə, eyni zamanda Azərbaycan Gənclərinə Dəstək Proqramı (AYAP) və Qızıl Aypara Cəmiyyətinin könüllüləri də qatılıblar.
Tərtər rayon icra hakimi, Qızıl Aypara Cəmiyyətinin nümayəndələri və layihənin pedaqoqu Qumru Səlimova çıxışı zamanı Əmək və Əhalinin Sosial Müdafiəsi naziri Sahil Babayevə göstərilən dəstəyə görə minnətdarlığını bildirib. Onlar layihə sayəsində əlilliyi olan uşaqların bilik və bacarıqlarının inkişaf etdirilməsində böyük uğur qazandıqlarını vurğulayıblar. Tədbir çərçivəsində həmin uşaqlar da iştirak ediblər. Şənliyi giriş sözü ilə açan layihənin pedaqoqu Qumru Səlimova məlumat verərək bildirib ki, layihənin əsas məqsədi fiziki məhdudiyyətli uşaqları cəmiyyətə inteqrasiya etmək və onların cəmiyyətdə yer tutması üçün səylərin artırılmasından ibarətdir. «Onlar da hiss etməlidirlər ki, cəmiyyətin bir parçasıdırlar. Bizim cəmiyyətdə onların hər birinin ayrı yeri var. O qeyd edib ki, bu layihə uşaqlara çox müsbət təsir edib. Əvvələr qələm tuta bilməyən uşaqlar hal-hazırda şəkil çəkə bilir, bir neçə ay bundan qabaq danışmaqdan əziyyət çəkən uşaqlar hal-hazırda şeir deyə bilirlər. Bizim bu layihəmiz uşaqlar üçün çox böyük əhəmiyyət daşıyır»,- deyə Səlimova bildirib.
Bütün əyləncə proqramı rahat bir atmosferdə keçirildi və şeirlər, rəqslər, təbriklər və şirniyyatlarla müşayiət olundu.
Şənlik zamanı Azərbaycanın Tərtər bölgəsindən olan uşaqlar üçün keçirilən xeyriyyə aksiyası çərçivəsində Bakı Britaniya məktəbinin tələbələrinin də hazırladığı və BAMF nümayəndələri tərəfindən çatdırılan hədiyyələr təqdim olundu. Hər bir hədiyyə ayrıca seçilib və göndərən tərəfindən şəxsən imzalanıb.
Bu, BAMF və Bakı Britaniya məktəbinin birgə təşkil etdiyi ilk xeyriyyə aksiyası deyil. Martın 30-da Fond məktəbi təmsil edən xüsusi dəvət olunmuş qonaq Filip Roşenin iştirakı ilə Azərbaycanın Tərtər bölgəsində uşaqlar üçün geniş xeyriyyə tədbiri təşkil etmişdi.
BAMF prezidenti Umud Mirzəyevin təşəbbüsü ilə təşkil olunan bu səfərdə münaqişə və onun nəticələri barədə Filip Roşenə məlumat verilib. Görülən işlər F.Roşeyə çox böyük təsir bağışlayıb. O, təmas xəttində dağıdılmış evləri görəndə və qaçqınların övladları ilə görüşən zaman onların erkən yaşlarında qarşılaşdıqları bütün çətinliklərə baxmayaraq, bacarıqlarını artırmaq, öyrənmək və irəli getmək istədiklərini müşahidə etdikdə bu mənzərəyə heyran qaldığını ifadə edib.
Bundan əvvəl, BAMF prezidentinin köməkçisi Anastasiya Lavrina, 100-dən çox yerli və xarici tələbənin, eləcə də məktəb işçilərinin iştirakı ilə Britaniya Məktəbində Fondun fəaliyyəti ilə bağlı təqdimat edib.
Belə bir əməkdaşlıq çərçivəsində 31 may tarixində Bakı Britaniya məktəbi, BAMF-in dəstəyilə Azərbaycanın Ümummilli Lideri Heydər Əliyevin xatirəsinə həsr olunmuş 3-cü beynəlxalq yarmarka keçirib və bununla müharibədən əziyyət çəkən bölgələrdəki qaçqın və məcburi köçkünlərə dəstək olub.
Bu dəfə Yeni il və Dünya Azərbaycanlıların Həmrəylik Gününün qeyd olunmasına həsr olunmuş tədbirin təşkilatçıları Azərbaycanın müharibədən əziyyət çəkən Tərtər rayonundan olan uşaqlar üçün kiçik bir sürpriz təşkil etmək qərarına gəliblər. Bununla onları unutmadıqlarını, xoşbəxt bir tətil arzuladıqlarını nümayiş etdirib və onlarla faliyyətin aktiv şəkildə davam etdiriləcəyini bildiriblər.