"Onu şəhidlərimizdən seçdirən bizim gözəl Fərizəmiz oldu, o, öz ölümüylə İlhamı göylərə qaldırdı" | Eurasia Diary - ednews.net

24 Oktyabr, Şənbə


"Onu şəhidlərimizdən seçdirən bizim gözəl Fərizəmiz oldu, o, öz ölümüylə İlhamı göylərə qaldırdı"

Cəmiyyət A- A A+

“Bizim içimizdəki müstəqillik arzusunu boğmaq istəyirdilər, amma buna nail ola bilmədilər. Şəhid olanlardan biri də qardaşım İlhamdı və onun heç bir şəhidimizdən elə fərqi yoxdur”

Eurasia Diary-nin məlumatına görə, bunu Moderator.az-a açıqlamasında 20 yanvar şəhidi İlham Allahverdiyevin (İlham və Fərizə) qardaşı Elxan Allahverdiyev deyib. O, şəhidlərimizlə qürur duyduğunu bildirib:

“İkinci dəfə infarkt keçirdim və bu gün Şəhidlər Xiyabanına gedə bilməyəcəm, amma ailə üzvlərim gedəcəklər. Həkimlər dedi ki, sənə həyəcan keçirmək olmaz. Bir neçə il öncə ürəyimdən açıq əməliyyat olundum və beş damarımı dəyişdilər. İndi özümü normal hiss edirəm, ev şəraitində müalicə olunuram”.

E.Allahverdiyev otuz ili tamam olan Qanlı Yanvar hadisəsi haqda da danışıb:

“İllər ötdükcə, mənə İlham və Fərizəsiz çox çətin olur. Hara baxıramsa, onları görürəm, çox böyük bir boşluq var həyatımda. Düzdür, bizim şəhidlərimizin qanı bahasına müstəqillik qazandıq və hamımız azad ölkənin vətəndaşlarıyıq, bununla fəxr edirik. Qaldı ki, 20 yanvara mən faciə kimi yox, qəhrəmanlıq salnaməsi kimi baxıram. İnsanlarımız tankların qarşısına əliyalın çıxıb öz canlarından keçdilər. Bizim içimizdəki müstəqillik arzusunu boğmaq istəyirdilər, amma buna nail ola bilmədilər. Şəhid olanlardan biri də qardaşım İlhamdı və onun heç bir şəhidimizdən elə fərqi yoxdur. Onu şəhidlərimizdən seçdirən bizim gözəl Fərizəmiz oldu, o, öz ölümüylə İlhamı göylərə qaldırdı, Azərbaycan kişisinə dəyər verdi. Bu gün 20 yanvar deyəndə ilk yada düşən İlhamla Fərizə olur. Bu günümüzə şükür edirəm ki, hörmətlə bütün şəhidlərimiz yad olunur, onların ruhu qarşısında hamımız baş əyirik. Allah cəmi şəhidlərimizi rəhmət eləsin. Sizlərə də minnətdarlıq edirəm”.

Qeyd edək ki, İlham və Fərizə 1989-cu il martın 19-da nişanlanıblar. 1989-cu il iyunun 30-da isə toyları olub. 1990-cı il 20 yanvar hadisəsi zamanı İlham şəhid olduqdan sonra bu faciəyə dözməyən Fərizə də zəhər içərək özünü öldürüb. Onların qoşa məzarları Şəhidlər Xiyabanındadır. Cütlüyün sevgi dastanı bu gün Azərbaycanda dillər əzbəridir. 30 iyun İlham və Fərizənin toy günü 2004-cü ildən qeyri-formal olaraq Azərbaycanda “Sevgililər Günü” kimi qeyd olunur.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...