Türkiyənin Azərbaycandakı səfirinə Odlar Yurdu Universitetinin fəxri doktoru adı verildi
Bu gün Türkiyənin Azərbaycandakı fövqəladə və səlahiyyətli səfiri Erkan Özoral Odlar Yurdu Universitetində olub. Universitet rəhbərliyinin, o cümlədən tələbə və müəllim heyətinin iştirakı ilə keçirilən toplantıda Universitetin rektoru Əhməd Vəliyev Erkan Özorala Türkiyə-Azərbaycan münasibətlərinə verdiyi töhfələr eyni zamanda Odlar Yurdu Universitetinin üzləşdiyi problemlər zamanı nümayiş etdirdiyi dəstəyə görə təşəkkür edib. Rektor E.Özoralın çox aktiv fəaliyyət göstərdiyini və hər iki dövlətin maraqları üçün yorulmadan çalışdığını bildirib. Ə.Vəliyev çıxışın sonunda E.Özorala Odlar Yurdu Universitetinin fəxri doktoru diplomunu təqdim edib.
E.Özoral bu təltifi heç gözləmədiyini və minnətdar olduğunu bildirib. Daha sonra səfir universitetdə təhsil alan türkiyəli və azərbaycanlı tələbələrin suallarını cavablandırıb.
Tələbələrin Türkiyənin Suriya siyasəti barədə yönəltdiyi suala səfir E.Özoral belə cavab verib:
“Türkiyənin məqsədi ədaləti və Suriyadakı vətəndaşların təhlükəsizliyini təmin etməkdir. Türkiyə Suriyanın bir qarış torpağında gözü yoxdur. Türkiyədə bu gün 4 milyon suriyalı qaçqın yaşayır. Bu insanlar öz həyatlarını xilas edib, yeni bir həyat qurmaq üçün Türkiyəyə sığınıblar. Suriyadakı siyasətimizin təməlində bu insanların öz vətənlərində rahat və firavan yaşamaları durur. Ordumuzun Suriyada olmasının əsas səbəbi isə sərhədlərimizə yaxın bölgədə terror qruplaşmalarının fəaliyyətinə əngəl olmaq və bununla da ölkəmizin təhlükəsizliyini təmin etməkdir”.
“Dünyada bu gün ədalətsizlik hökm sürür. Ədalətsizliyin olduğu regionlardan biri də Dağlıq Qarabağdır. Ermənistanın işğal siyasəti nəticəsində bir milyondan çox azərbaycanlı qaçqın və məcburi köçkün öz yurd-yuvalarından didəgrin düşüb. Türkiyə hər zaman bu və digər məsələlərdə Azərbaycana dəstək olub, və bugün də bütün gücümüzlə Azərbaycanın yanındayıq. Dağlıq Qarabağ problemiylə bağlı Münxendə cənab prezident İlham Əliyevin çıxışı bütün dünyaya Qarabağ məsələsində haqlı tərəfin Azərbaycan olduğunu bir daha sübut etdi. Bu çox cəsarətli siyasi bir gediş idi. Məlumdur ki, bir çox liderlər belə debatlardan yayınır. Lakin İlham Əliyev böyük cəsarətlə bu debata çıxdı və müfəvvəq oldu. Onu cəsarətləndirən əsas amilsə Azərbaycanın Dağlıq Qarabağ məsələsindəki haqlı mövqeyi idi”-deyə səfir əlavə edib.
Tədbirin sonunda E.Özoral Odlar Yurdu Universitetinin Mövlana proqramı əsasında Türkiyənin Bingöl Universitetində dərs demiş müəllimlərinə sertifikatlar təqdim edib.
Nicat İsmayılov