“Cənab Prezidentin çağırışına dəstək olaraq "SƏLİS Könüllülər"i yaşlı vətəndaşlara sosial xidmətlərin göstərilməsi prosesinə qoşulur. Bizim üçün çox dəyərli olan yaşlı nəslin nümayəndələrini qorumaq və belə həssas məqamda onlara könüllü dəstək olmaq hamımızın borcudur!”- bu sözləri Azərbaycan Respublikasının Prezidenti yanında QHT-lərə Dövlət Dəstəyi Şurasının sədri, millət vəkili Azay Quliyev rəsmi tvitter səhifəsində yazıb. Azay Quliyev deputatı olduğu Binəqədi rayonu ərazisində yaşayan ahıl insanlarla bağlı digər tviter açıqlaması da diqqəti çəkib. Azay Quliyev qeyd edib ki, “Mart ayının 25-dən etibarən #Koronavirusla bağlı #evdəqalaq təlimatı çərçivəsində yaşı 65-dən yuxarı olan Seçicilərimin üzləşə biləcəkləri mümkün problemlərin həllinə kömək məqsədilə http://azayguliyev.az saytı üzərindən "elektron müraciət xidməti" fəaliyyətə başlayır”. Əlavə olunub ki, 8 saylı Binəqədi birinci Seçki dairəsi ərazisində yaşayan könüllülərdən/ aşağı yaş kateqoriyasında olan seçicilərimdən yaşlı nəslin nümayəndələrinin üzləşdikləri çətinliklər və sosial xidmətlə bağlı ehtiyacları barədə http://azayguliyev.az saytı üzərindən "elektron müraciət xidməti"nə məlumat verməkləri xahiş olunur. Məlumat üçün bildirək ki, Prezident İlham Əliyev Mənzil İnşaatı Dövlət Agentliyinin ikinci layihəsi olan Hövsan yaşayış kompleksi ilə tanışlıqdan sonra Azərbaycan Televiziyasına müsahibəsində onun göstərişi ilə yaşlı tənha insanların təminatını təchiz etmək üçün sosial işçilərin səfərbərliyi nəzərdə tutulur və onlar bu işi görəcəklərini deyib: “Eyni zamanda, fürsətdən istifadə edərək çoxminli könüllülər ordusuna da müraciət etmək istəyirəm. Hesab edirəm ki, bizim könüllülərimiz də bu işlərə qoşulmalıdırlar, Operativ Qərargahla təmas saxlamalı, Əmək və Əhalinin Sosial Müdafiəsi Nazirliyi ilə əlaqədə olmalıdırlar. Hər halda, nazirliyə də göstəriş verilib ki, yaşlı insanlara onların yaşadıqları yerlərdə xidmətlər göstərilsin, - istər dərman preparatları olsun, istərsə də ərzaq, - biz tənha vəziyyətdə yaşayan yaşlı insanları qoruyaq”.