Professor Naciye Selin Şenocak, Birləşmiş Millətlər Təşkilatının yenidən qurulması funksiyasını yerinə yetirən Sivilizasiyalararası Dialoq Tədqiqat İnstitutunun Elmi Şurası və İdarə Heyətinin üzvü vəzifəsinə təyin olunub.
Beynəlxalq Avrasiya Mətbuat Fondu (BAMF), eləcə də EDNews və onun bütün kollektivi prof. N.S.Şenocağı bu yeni vəzifəyə təyin olunması münasibətlə səmimi qəlbdən təbrik edir, ona şərəfli və məsuliyyətli fəaliyyətində böyük uğurlar diləyir.
Professor, siyasi elmlər doktoru Naciye Selin Şenocak, YUNESKO-nun Mədəni Diplomatiya, İdarəetmə və Təhsil kafedrasının müdiri, Ermənistan-Azərbaycan Vətəndaş Sülh Platforması İdarə Heyətinin üzvü, Türkiyədə yerləşən Diplomatik və Strateji Araşdırmalar Mərkəzinin direktoru, Almaniyada Sivilizasiyalararası Dialoqu Araşdırma İnstitutunun Elmi Şurasının və İdarə Heyətinin üzvü, Hindistanda Jain Universitetinin İdarə Heyətinin üzvü, Mədəniyyət, Elm və İnnovasiya Diplomatiyası üzrə Avropa Liderliyinin tədqiqatçısı, Qara Dəniz Qadınları Davamlı İnkişaf Dərnəyinin sədridir.
Naciye xanım həmçinin, 2008-ci ildə Dünya İqtisadi Forumunda təşkil edilən Davos Zirvə görüşü çərçivəsində fəaliyyət göstərən Qadın Təsir Birliyi tərəfindən dünyanın müxtəlif ölkələrində haqsızlığa uğrayan müsəlman xalqlarının müdafiəsi istiqamətində göstərdiyi səylərə görə "İlham Pərisi" mükafatına layiq görülüb.
BMT-nin İqtisadi və Sosial Şurasının QHT bölməsinin ən yüksək statuslu üzvü olan Beynəlxalq Avrasiya Mətbuat Fondu (BAMF), prof. N.S.Şenocak ilə uzun müddətdir ki, işgüzar əməkdaşlıq edir. N.S.Şenocak, bir neçə dəfə Azərbaycana səfər edərək, BAMF-in rəhbəri Umud Mirzəyev ilə beynəlxalq əhəmiyyətli mövzuları müzakirə edib. O, BAMF-in missiyası olan dünyada sülhün qorunması məqsədilə münaqişə və mübahisələrlə bağlı bir çox aktual mövzuda dəyərli rəylərini bölüşüb.
Prof. Naciye Selin Şenocak, 2018-ci ildə "Mədəni İmperializmdən Milli Brendinqə kimi: Aİ-nin Mədəni Diplomatiyasının Problemi" mövzusunda BAMF-in ofisində açıq mühazirə keçirib. O, sülhyaratma proseslərində mədəni diplomatiyanın dünyadakı sabitliyə təhlükə yaradan müsbət və mənfi tərəfləri barədə danışaraq, mədəni diplomatiyanın gələcək perspektivdə dövlətlərə necə təsir göstərə biləcəyini izah edib. Professor, mədəni diplomatiyanın insanların müxtəlif cəmiyyətlərə inteqrasiya etməsi üçün əsas komponent olduğunu, həmçinin bu diplomatiyanın müxtəlif nöqteyi nəzərdən çox ciddi şəkildə nəzərə alınmasının zəruriliyini qeyd edib. Təqdimatı zamanı N.S.Şenocak, bəzi hallarda qərb mədəni diplomatiyasının saxta səhnə arxasında necə gizləndiyi vurğulayıb.
"Biz bir çox hallarda müxtəlif maraqlı qrupların insan hüquqları və söz azadlığı iddialarının arxasında ikili standartlarla durduğunun şahidi olmuşuq. Bu, bir sıra beynəlxalq qurumları və eyni zamanda media sənayelərini əhatə edən təzyiq növlərindən yalnız biridir," deyə N.S.Şenocak bildirib.
Hazırda Naciye Selin Şenocağın yeni üzv təyin olunduğu institut beynəlxalq ictimaiyyətin üzləşdiyi vacib problemləri həll edən, yeni təkliflər araşdıran və inkişaf etdirən bir düşüncə mərkəzidir. Onun əsas strategiyası həm irəli sürdüyü siyasət inkişafı təkliflərində, həm də geniş beynəlxalq ekspertlərlə davamlı əlaqələrində dayanır. Sivilizasiyalararası Dialoq Tədqiqat Tədqiqat İnstitutu, eyni zamanda, dünyanın dörd bir tərəfindəki insanların birgə çalışmalarını təmin etməklə yanaşı, dialoqun təməl prinsipləri, eləcə də, milli və beynəlxalq siyasət aparıcıları və qurumları üçün tətbiq olunan təhlillər hazırlamaq imkanı verən müstəqil bir forum təqdim edir.
Sonda, professor Naciye Selin Şenocağın bu məsul vəzifəyə təyin olunması ilə əlaqədar məmnunluğumuzu ifadə edərək, ona yeni görəvində böyük müvəffəqiyyətlər və möhkəm can sağlığı arzulayırıq.
EDNews