Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev Binəqədi rayon 8-ci seçki dairəsində yaşayan seçicilərə müraciət ünvanlayıb.
O müraciətində, Seçki Qərargahının üzvlərini və fəal seçicilərini ölkədə koronavirus təhlükəsi ilə mübarizə aparıldığı bir zamanda, ərazidə yaşayan həssas əhali qrupu ilə bağlı məsələləri diqqətdə saxlamağa, onların problemlərinin həllinə yardımçı olmağa və bununla da dövlətimizin həyata keçirdiyi tədbirlərə həmrəylik nümayiş etdirməyə çağırıb.
Millət vəkili epidamiyanın sürətlə yayılma riskinin yüksək olduğu bir vaxtda vətəndaşların üzləşdiyi çətinliklərin aşkarlanması, onların həlli istiqamətində müvafiq addımların atılması məqsədi ilə seçildiyi 8-ci dairənin sakinləri arasında seçki qərargahının ən fəal üzvlərindən ibarət “whatsapp” qrupunun yaradıldığını bildirib. Bununla yanaşı Azay Quliyev birbaşa müraciət etmək istəyən seçicilərini https://azayguliyev.az/home/az elektron portalında “seçicinin elektron kabineti” xidmətindən istifadə edərək, qeydiyyatdan keçib müraciətini ünvanlamaq imkanı olduğunu bildirib.
Azay Quliyev belə bir həssas məqamda öz seçicilərinə qayğı məqsədilə onlara imkan daxilində dəstək göstəriləcəyini və bu çətin günlərdə onlarla birgə olacağını bildirib. “Ümid edirəm ki, belə bir həssas məqamda biz hamımız birlikdə Seçki dairəmizin ərazisində yaşayan qayğıya, diqqətə ehtiyacı olan vətəndaşlarımızı tək qoymayacaq, onların problemlərinin həllində yaxından iştirak edəcəyik ” deyə Azay Quliyev öz müraciətində qeyd edib.
Hazırda millət vəkili Azay Quliyevin təşəbbüsü ilə 8-ci dairədə yaşayan 200 imkansız ailəyə ərzaq yardımı, 2000 nəfərə isə tibbi maska və spirt paylanılması istiqamətində işlərə başlanılıb. A.Quliyev artıq kampaniyanın 1-ci mərəhələsi üçün yardım olunacaq şəxslərin siyahısını öz fəallarına qrup mesajı vasitəsilə göndərib. O, eyni zamanda siyahısında adı olmayan və 1-ci mərhələyə şamil edilən şəxslərin yenidən araşdırılaraq siyahıya alınmasını və onların da bu yardımdan faydalana bilmələrinin təmin edilməsini xahiş edib.
Azay Quliyev bu işdə ona dəstək olan komanda üzvlərinə güvəndiyini və bu çətin missiyanın öhdəsindən birgə olaraq uğurla gələ biləcəklərinə inandığını vurğulayıb. “Mən deputat kimi məsuliyyətimi dərk edərək üzərimə düşən vəzifəni yerinə yetirməyə hazıram. Əminəm ki, biz bir komanda kimi bu çətin vəzifənin də öhdəsindən layiqincə gələcəyik.
Cənab Prezidentin dediyi kimi Biz birlikdə Güclüyük ! ”