"Hazırda dünya ölkələri bütün gücünü pandemiya ilə mübarizəyə yönəldib. Azərbaycan ilk gündən bu sahədə operativ və adekvat qərarlar qəbul etdi. Ölkəmiz özünə qapanmadı. Azərbaycan həmişə olduğu kimi bu dəfə də təşəbbüsü əla alaraq bir sıra tədbirlərin təşəbbüskarı və təşkilatçısı oldu. Belə tədbirlərdən biri də dünən "Microsoft" şirkətinin rəhbərliyi ilə keçirildi. Qeyd etmək lazımdır ki, Azərbaycanda son illər informasiya texnologiyaları sahəsində böyük uğurlara nail olub. Sonuncu görüş də müzakirə olunan məsələlər ölkəmizin bu sahəyə verdiyi önəmin göstəricisidir". Bunu SİA-ya millət vəkili Ceyhun Məmmədov deyib.
Deputatın sözlərinə görə, ölkəmiz lisenziyalaşdırılmış proqramların istifadəsinə xüsusi önəm verir: "Çoxlu sayda proqramların paylanılması bu sahəyə böyük dəstəkdir. Eyni zamanda ölkəmizdə piratçılıqla ciddi mübarizə aparılır. Azərbaycan qısa müddətdə bir çox sahələrdə, o cümlədən, təhsil sahəsində müasir proqramların təbiqinə başladı. Bu baxımdan "Microsoft teams" proqramı onlayn təhsilin təşkilinə böyük dəstək oldu. Qısa müddətdə bütün ali təhsil müəssisələri bu proqramla təmin olundu. Prezident İlham Əliyev çıxışında distant təhsillə bağlı məsələlərə də toxunub. Qeyd edib ki, pandemiya ilə əlaqədar bu vəziyyət bizi məcbur edir ki, distant təhsil məsələlərinə yeni bucaqdan baxaq. Çox vaxtın olmamasına baxmayarq Azərbaycan mövcud vəziyyətə özünü uyğunlaşdıraraq müəyyən addımlar atdı. Ölkəmizdə məktəb və universitetlərimiz mart ayından bəri bağlanıb. Hazırda sentyabrın 15-dən başlayacaq yeni tədris ilinə hazırlıq gedir. Ancaq pandemiya ilə bağlı vəziyyətin necə olacağı bilinmir, məktəb və universitetlərin açılıb-açılmayacağı məlum deyil. Ona görə ölkəmiz ən pis ssenariyə hazırlıqlı olmalıdır. Hazırda bu istiqamətdə ölkəmizdə ciddi işlər gedir. Qısa müddətdə böyük uğurlara nail olunacağı istisna olunmur.
Görüşdə Azərbaycanda Abşeron vadisinin yaradılması barədə də müzakirələr aparıldı. Bunun üçün güclü iradə və konkret hədəflər var. Azərbaycanın buna kifayət qədər potensialı var. Ölkəmizdə bu sahədə görülən işlər bu fikri bir daha təsdiq edir. Prezident İlham Əliyev görüşdə həmçinin Azərbaycanın bu mühüm məsələnin həllində Ümumdünya Səhiyyə Təşkilatı tərəfindən nümunə adlandırıldığını, vəziyyətin nəzarət altında olduğunu, Azərbaycanın artıq 29 ölkəyə humanitar yardım göstərdiyini və bu prosesin davam etdiyini, ölkəmizin özünü beynəlxalq ictimaiyyətin etibarlı üzvü kimi nümayiş etdirdiyini xüsusi vurğuladı".