17 iyun Beynəlxalq həkimlər günüdür. Ölkədə koronavorus pandemiyasına qarşı aparılan mübarizə tədbirləri gücləndirilir, dövlət başçısı vətəndaşlara çağrışlar edir. Bu mübarizənin ön cəbhəsində isə həkimlərimiz, səhiyyə işçilərimiz gəlir.
Koronavirusla mübarizə və həkimlərə dövlət başçısının diqqət və qayğısını hafta.az-a şərh edən millət vəkili Ceyhun Məmmədov dedi ki, dünyanın ən məsuliyyətli, ağır və şərəfli peşələrindən biri həkimlikdir:
" Bu gün bəşəriyyətin sağlamlığının qorunmasında bu peşə sahiblərinin müstəsna rolu var. İnsanların həyatını xilas etmək üçün bu peşə sahibləri böyük fədakarlıq göstərir, hətta öz həyatlarını riskə atırlar. Dünyanın müharibə gedən bölgələrində də ən çox dünyasını dəyişən peşə sahiblərindən biri də həkimlərdir.
Bu gün Azərbaycanda səhiyyə sahəsinə böyük diqqət və qayğı var. Son illər çoxlu sayda yeni müəssisələr inşa olunaraq vətəndaşların istifadəisnə verilib, yeni avadanlıqlar alınıb. Əvvəlki dövrlərlə müqayisədə bu gün ölkəmizdə səhiyyə sahəsi xeyli inkişaf edib, böyük nailiyyətlər əldə olunub.
Bu gün pandemiya ilə mübarizədə də həkimlərimiz böyük fədakarlıq göstərirlər. Bu gün bəzi həkimlərimiz də bu virusun qurbanları olublar. Bu baxımdan onlara xüsusi təşəkkür düşür.
Qeyd etmək lazımdır ki, bu gün Prezident İlham Əliyev və Birinci vitse-prezident Mehriban xanım Əliyeva bu müqəddəs peşə sahiblərinə böyük diqqət və qayğı ilə yanaşırlar. Onlarla birlik və həmrəylik nümayiş etdirirlər.
Bir çox sınaqlardan üzüağ çıxdığımız kimi, bu bəladan da uğurla çıxacağıq. Bunun üçün hər birimiz karantin qaydalarına tam əməl etməli, özümüzü və yaxınlarımızı qorumalıyıq. Əks halda çox ciddi sınaqla və ağır nəticələrlə üz-üzə qala bilərik.
Fürsətdən istifadə edib bütün həkimlərimizi bu gün münasibətilə səmimi-qəlbdən təbrik edirəm".
