AZTV-də yayımlanan "Çıxışa Doğru" proqramında “Karantin qaydalarının pozulmaması üçün sosial məsuliyyət nədən ibarət olmalıdır?“ mövzusunda ekspertlərin iştirakı ilə müzakirələr aparılıb. EDNews.net-in məlumatına görə müzakirələrdə Ailə Qadın və Uşaq problemləri üzrə Dövlət Komitəsinin sədrinin müavini Sədaqət Qəhrəmanova, Beynəlxalq Avrasiya Mətbuat Fondunun Prezidenti Umud Mirzəyev, Qarabağ qazisi jurnalist Rey Kərimoğu, Təhsil Nazirliyi yanında İctimai Şuranın məsul katibi, fəlsəfə elmləri doktoru İlqar Orucov iştirak ediblər.

Azərbaycan cəmiyyətində bugün koronavirusa inanan və inanmayanların olduğunu deyən Sədaqət Qəhrəmanova bəzi insanların sosial şəbəkədə iki günlük karantin qaydaları ilə bağlı səsləndirdiyi müxtəlif bəhanələrə toxunub:

“Azərbaycan özünəməxsus dövlətdir və pandemiyaya yanaşmamız da fərqli oldu. Ölkədə görülən tədbirlərə və çağırışlara inanmayan insanlarımız var. Əgər cənab Prezident və birinci xanım xalqa müraciət edirlərsə, “bizim gücümüz birliyimizdədir” deyərək çağırış edirlərsə, deməli cəmiyyətdə birlik yaranmalıdır. Məsuliyyətsiz insanlar həmişə bəhanə axtarır”, Sədaqət Qəhrəmanova deyib.

Beynəlxalq Avrasiya Mətbuat Fondunun Prezidenti Umud Mirzəyev bildirib ki, hökumətin verdiyi göstərişlər pandemiya ilə bağlı yaranmış şəraitin diktəsidir:

“Bu gün dünya alov içindədir. Sosial məsafəyə, maskalardan istifadə qaydalarına və ünsiyyətin qurulması yollarına diqqət yetirmək çox vacibdir. Şənbə və bazar günlərindən sonra insanlar hər şeyi unudaraq bir-birinə sarılır. Dünya qanunlarla idarə olunur ancaq sosial məsuliyyət heç bir qanun çərçivəsinə sığmır. Biz bunları minillik tariximizlə, ailəmizdən, dini vərdişlərimizlə öyrənmişik. Bütün sahələrdə öndə duran məsələ Azərbaycan insanının sağlamlığı, onun təminatıdır. Sosial sahədə çalışanlar həkimlərimizlə bərabər, aylarla evinə getməyən çox sayda insan var. Burada biz fərd olaraq dəstəyimizi göstərməsək, görülən işlərin effekti çox az olacaq. Bir müddət sonra sərhədlər açıldığı zaman sosial məsuliyyətin əhəmiyyəti də artacaq" -deyə Umud Mirzəyev qeyd edib.   

EDNews.net verilişin video yazısını sizlərə təqdim edir: