Xəbər verdiyimiz kimi, son günlər Kür çayının səviyyəsinin kəskin azalması Kür sahilində yerləşən rayonlarda içməli su qıtlığı yaradıb.
EDNews.net xəbər verir ki, Neftçaladan seçilmiş millət vəkili Fəzail Ağamalı isə öz təşəbbüsü ilə Neftçala rayon Həsənəbad qəsəbəsi sakinlərinə su paylayıb.
Bizi narahat edən əsas məsələ bu kənddə, o cümlədən, Salyan, Neftçala, Sabirabad, Kürdəmir və digər rayonlarımızda su qıtlığı probleminin yaşanmasının səbəbləridir. Kürdə su səviyyəsinin azalması bu işin sadəcə ekoloji səbəbidir. Problemin kökündə isə rayon icra hakimiyyətlərinin yarıtmaz fəaliyyəti durur. Son 10 ildə dövlət başçısının regionların sosial-iqtisadi inkişaf planına uyğun olaraq milyardlarla manat vəsait ayırmasına baxmayaraq niyə bu rayonlarda vətəndaşın adicə içməli su problemi həll edilməyib? Kim bu milləti bir ovuc suya möhtac qoyub?
Qeyd edək ki, bir müddət əvvəl millət vəkili Sabir Rüstəmxanlı da bu problemi Milli Məclisdə qaldırmışdı: "Bu gün Neftçaladan Salyana qədər hətta heyvanların belə içməsi üçün su yoxdur. Hansı ki, keçən il Prezident 5 milyon vəsait ayırıb içməli su kəməri ilə bağlı, amma problem həll olunmayıb. 12 su maşını ilə 80 min nəfərlik rayonu su ilə təmin etmək olmaz. Heyvanlar camaatın gözü qabağında susuzluqdan qırılır, əhali içməyə, əl-üzünü yumağa su tapmır. 5 milyona su kəməri çəkilsəydi, insanlar bu vəziyyətdə qalmazdı. Kürün suyu kəskin şəkildə azalıb, Xəzərin şor suyu Kür suyuna qarışıb. Mən burdan Neftçala camaatının adından həyəcan siqnalı çalıram. Bu məsələ vaxtında həll olunmalıdır, süni yollarla camaatımızı narazı salmalı deyilik”.
Nicat İsmayılov