Xəbər verdiyimiz kimi avqustun 11-də kornavirusa yoluxanların sayında artım müşahidə olunub. Belə ki, 84 yoluxma yeni faktı qeydə alınıb, 214 nəfər müalicə olunaraq sağalıb və evə buraxılıb. Dünənki statistikada cuzi də olsa artım müşahidə olunub. Sentyabrın 15-də Azərbaycanda tədris başlayır. Yoluxanların sayı artma dinamikası ilə davam edərsə sentyabrın 15-də dərslər onlayn keçirilə bilərmi?
Bununla bağlı Sonxeber.az-a danışan deputat Ceyhun Məmmədov bildirib ki, dərslərin keçirilməsi ilə bağlı məsələ dünyanın bir çox ölkəsində müzakirə olunur:
"Almaniyada artıq dərslərə başlanılıb. Konkret qaydalar çərçivəsində yəni maska taxmaq və ciddi təlimatlara əməl etməklə tədrisin başlanılması ilə bağlı işlər gedib. Hazırda Türkiyədə də dərslərin hansı formada aparılması ilə bağlı müzakirələr getməkdədir. Pandemiya ilə bağlı dərslərin hansı formada keçirilməsi məsələsi bir çox dünya ölkələrini düşündürür. Bildiyiniz kimi Azərbaycanda sərt karantin rejimi tədbiq edilirdi. Burada məqsəd əhalinin sağlamlığının qorunması idi. Cəmiyyətdə müəyyən müzakirələr aparıldı. Bəzi insanlar da bu sərt karantin rejiminin aradan qaldırılması ilə bağlı müəyyən təkliflərlə çıxış etdilər. Hazırda ölkə ərazisində koronavirusa yoluxanlarının sayının artması gözlənilir. Bu artım dünəndən müşahidə olunmağa başladı. Karantin rejiminin yumşaldılmasının səhəri günü Bakıda və ayrı-ayrı bölgələrdə çimərliklərə kütləvi şəkildə insanların axını oldu. Yoluxanların sayında artım müşahidə olunarsa dərslərin onlayn keçirilməsi məsələsi bir çox ölkədə gündəmdədir. Bir mənalı olaraq Azərbaycanda da xəstəlik sürətlə yayılarsa, yoluxmaların sayı çoxalarsa dərslər onlayn keçirilə bilər. Çünki bu halda məktəblərin açılması müəyyən çətinliklər yarada bilər. Bu məsələ təbii ki, insanlarımızın qoyulan qaydalara əməl etməsindən asılı olacaq. Arxayın olmaq olmaz. İnsanlarımız karantin qaydalarına əməl etməlidir. Ehtiyac olmadan evdən çıxmamalı, özümüzü qorumalıyıq. Biz bu yolla normal həyatımıza qayıda bilərik".
Aysel Yusifqızı