Bu gün Nazirlər Kabineti yanında Operativ Qərargah brifinq keçirib. Brifinqdə TƏBİB İdarə Heyəti yanında tibbi-elmi komitənin sədri Akif Qurbanov və Prezidentin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev brifinqdə jurnalistlərin suallarını cavablandırıb.

Eurasia Diary-nin məlumatına görə, Prezidentin köməkçisi təhsil ili və tədris prosesi də daxil olmaqla sual doğuran bir çox məsələlərə aydınlıq gətirib.

“Məktəblərin açılması ilə əlaqədar avtobusların sayı yenə artırılacaq: “Dərslərin də müxtəlif günlərdə keçirilməsi nəzərdə tutulur. Eyni zamanda valideynlərə də bu sahədə müəyyən hüquqlar verilir”, deyə o qeyd edib.

H. Hacıyev metronun açılması və rayonlara gediş-gəlişə qoyulan məhdudiyyətin aradan qaldırılması kimi cəmiyyəti narahat edən məsələlərə toxunub.

“Metro ilə əlaqədar ekspertlər müxtəlif potensial risk amillərinin olduğunu bildirib. Metroda ventilyasiya və dar, qapalı məkan olması müəyyən qədər ehtiyatlı davranmağa əsas verir. Sentyabrın 15-nə qədər bu məsələlərə yenidən baxılacaq. Rayonlararası gediş-gəliş məsələsi də Operativ Qərargahda müzakirə olunacaq”.

O qeyd edib ki, dövlət orqanlarında ştat cədvəlinin 50 faizi səviyyəsində iş davam etdiriləcək.

“Epidemioloji vəziyyət nəzərə alınaraq, mərhələli şəkildə addımlar atılması vacibdir. İri ticarət mərkəzləri barədə məsələ də müzakirə olunaraq, bu barədə müvafiq qərarlar veriləcək.

H. Hacıyev koronovirus peyvəndinin ölkəyə gətirilməsi barədə deyib ki, peyvəndin hazırlandığı xarici ölkələrlə əlaqə saxlanılır.

“Sertifikatlaşmadan keçən peyvəndlərin ölkəyə gətirilməsi də gündəmdə saxlanılacaq. Dünya səviyyəsində qəbul edilmiş, sertifikasiya edilmiş və kənar təsirləri olmayan peyvəndlər vacib şərtdir”.

Sərhədlərin açılması məsələsi ilə bağlı danışarkən H. Hacıyev Rusiyanın quru sərhədindən vətəndaşların gətirilməsinin davam etdiyini bildirib.

“Qazaxıstan və Orta Asiyanın digər ölkələrindən testlərdən sonra vətəndaşların bərə və hava nəqliyyatı ilə gətirilməsi həyata keçirilir. İstanbuldan da koronavirus testi əsasında vətəndaşların gətirilməsi təmin olunur. Biz yenə də vətəndaşlarımızı zərurət olmadığı şəraitdə xarici səfərlərdən çəkinməyə çağırırıq. Çünki dünyada koronavrusla bağlı risklər göz önündədir”.

Nəticə etibarilə beynəlxalq yükdaşımalar xaric, həmçinin Azərbaycan vətəndaşlarının təxliyə edilməsi, yaxud da xüsusi ehtiyacı olan, Azərbaycan vətəndaşları ilə müəyyən qohumluq əlaqələri olan və ya hansısa xüsusi bir sahədə çalışan xarici ölkə vətəndaşları istisna olmaqla, Azərbaycanın quru sərhədləri qapalı olmaqda davam edəcək”. 

TƏBİB İdarə Heyəti yanında tibbi-elmi komitənin sədri Akif Qurbanov qeyd edib ki, dövlət səviyyəsində mövsümi qrip vaksinlərinin alınması ilə bağlı iş gedir.

“Yaxın 1-2 ay ərzində ölkəyə mövsümi qriplərlə bağlı vaksinlər gətiriləcək. Çünki qriplə bərabər koronavirusa yoluxma daha çox ağırlaşmalara gətirib çıxara bilər. Bizə lazım olan budur ki, hazırda əhalinin neçə faizi bu xəstəliyi keçirib. Bilsək ki, 50-60 faiz əhali bu xəstəliyi keçirib, çox güclü yumşalmalara da gedə bilərik. Onda bilərik ki, insanların 2/3 hissəsi immunitet qazanıb, onlarda anticisimlər var, onda karantin rejimini də çox sərtləşdirməyə ehtiyac yoxdur".     

A. Qurbanov deyib ki, ali məktəblərdə mühazirələr birmənalı onlayn olacaq. Praktik məşğələlərdə isə fərqli yanaşma, həm onlayn, həm də adi qaydada ola bilər. 

“Aşağı siniflər ənənəvi qaydada tədrisi davam etdirsə də, yuxarı siniflərdə onlayn dərslər üstünlük təşkil edəcək”, deyə Komitə sədri bildirib.