Bu gün millət vəkili, Azərbaycanın AŞPA-dakı nümayəndə heyətinin üzvü Könül Nurullayeva Beynəlxalq Avrasiya Mətbuat Fondunun baş ofisinə ziyarət edib. Ziyarət zamanı millət vəkili Könül Nurullayevanın BAMF prezidenti Umud Mirzəyevlə faydalı müzakirələri olub. BAMF-ın fəaliyyətinə dair məlumat verən U. Mirzəyev təşkilatın beynəlxalq platformadakı fəaliyyətindən söz açıb, BMT agentlikləri, beynəlxalq təşkilatlarla birgə əməkdaşlıq pespektivlərindən danışıb. BAMF prezidenti ölkəmiz haqda, eləcə də işğal altındakı ərazilərimizlə bağlı BAMF-ın gördüyü işlər, yerinə yetirdiyi proqramlara dair millət vəkilinə məlumat verib. O, ölkəmizin haqq səsinin dünyaya çatdırılması üçün dövlət-vətəndaş cəmiyyəti və beynəlxalq qurumların qarşılıqlı əməkdaşlığının əhəmiyyətini vurğulayıb.
Təşkilatın gördüyü işləri yüksək dəyərləndirən millət vəkili Könül Nurullayeva vətəndaş cəmiyyəti qurumlarının fəaliyyətinin əhəmiyyətinə toxunub. O, ölkəmizin vətəndaş cəmiyyəti qurumlarının beynəlxalq platformadakı fəaliyyətinin artırılması üçün tərəfdaşlıq imkanlarının gücləndirilməsinin vacibliyini qeyd edib. Bunun üçün əməkdaşlıq etməyə hazır olduğunu ifadə edib. Azərbaycanın Avropa Şurası Parlament Assambleyasındakı nümayəndə heyətinin üzvü olan millət vəkili, bu qurumda təmsil olunan deputatlarımızın fəaliyyətindən söz açıb. İmkanların gücləndirilməsi üçün dövlət-vətəndaş cəmiyyəti və beynəlxalq təşkilatlar arasındakı əlaqələrin gücləndirilməsinin ölkəmiz üçün faydalı olduğunu qeyd edib. Daha sonra U. Mirzəyev millət vəkilini BAMF tərəfindən hazırlanan və işğal olunmuş ərazilərimizdəki acı görüntüləri əks etdirən posterlərlə tanış edib.
Qeyd edək ki, Nizami rayonundan millət vəkili seçilən Könül Nurullayeva Qarabağ məsələsinin beynəlxalq platformalarda səsləndirilməsi, AŞPA-da çıxışları və ölkəmizin beynəlxalq münasibətlər sistemindəki yeri mövzusundakı yazıları ilə son vaxtlar diqqət mərkəzində olub.
BAMF-ın mətbuat departamenti