Bu gün Ukrayna Respublikasının Azərbaycandakı Səfirliyinin birinci katibi Dmitro Berejni və mətbuat məsələləri üzrə əməkdaş Aleksandr Dorofeyev Beynəlxalq Avrasiya Mətbuat Fondunun prezidenti Umud Mirzəyevlə görüşüblər. Eurasia Diary xəbər verir ki, görüş zamanı Azərbaycan və Ukraynada fəaliyyət göstərən media və vətəndaş cəmiyyəti qurumları arasında əməkdaşlıq, münaqişələrin həll olunmasında obyektiv informasiyanın yayılması kimi məsələlər müzakirə olunub.

BAMF prezidenti Azərbaycan və Ukrayna xalqları arasında ortaq tarixi, mədəni əlaqələrdən, dostluq münasibətlərdən söz açıb. Ukrayna səfirliyinin əməkdaşları da hal-hazırda Ukrayna və Azərbaycan arasında mehriban və sıx dostluq münasibətlərinin mövcudluğunu qeyd ediblər.    

“Təsadüfi deyildir ki, Tovuz istiqamətində baş verən hadisələri qınayaraq bunu provokasiya adlandıran ölkələrdən birincisi də Ukrayna oldu. Bu da iki ölkə arasında, iki ölkə xalqları arasında olan münasibətlərin əhəmiyyətindən xəbər verir”, deyə D. Berejni bildirib. O, BAMF-ın fəaliyyətinin vətəndaş cəmiyyəti qurumları üçün bir nümunə olduğunu da vurğulayıb.

Səfirliyin mətbuat məsələləri ilə bağlı əməkdaşı Aleksandr Dorofeyev isə tezliklə Ukraynada baş tutacaq ərazi idarəetmə seçkilərini işıqlandırmaq üçün Azərbaycan mətbuat nümayəndələrinin iştirakı məsələlərinə toxunub.

Daha sonra Umud Mirzəyev Qarabağın işğalı nəticəsində erməni hərbi birləşmələri tərəfindən törədilmiş vandalizm əməllərini əks etdirən posterləri və filmi qonaqlara təqdim edib. Sonda birgə əməkdaşlıq perspektivlərinə dair fikir mübadiləsi aparılıb.