Beynəlxalq Avrasiya Mətbuat Fondu Ermənistan Azərbaycan münaqişəsinə dair bəyənat yayıb.
Eurasia Diary həmin bəyanatı sizə təqdim edir:
27 sentyabr 2020-ci il tarixdən Azərbaycan Hərbi birləşmələri Dağlıq Qarabağ və ona bitişik 7 rayonun işğaldan azad olunması əməliyyatlarına başlamışdır. 30 ildir ki, öz yurd-yuvasından didərgin salınmış azərbaycan insanı ölkənin müxtəlif bölgələrinə səpələnərək, qaçqın, məcburi köçkün həyatı yaşayır. BMT Təhlükəsizlik Şurasının 1993-cü ildə qəbul etdiyi və işğal altında olan ərazilərdən erməni hərbi birləşmələrinin geri çəkilməsini tələb edən 4 qətnamənin şərtlərinə 30 ilə yaxındır ki, əməl olunmur. Nəticədə Azərbaycanın işğal olunmuş Dağlıq Qarabağ və ətraf rayonlarında 900 çox yaşayış məntəqəsi, 150 mindən çox ev və yaşayış mənzili, 7000 ictimai bina,1025 məktəb, 855 uşaq baxçası, 927 kitabxana, 1510 mədəniyyət müəssisəsi, 40 mindən çox muzey eksponatı dağıdılaraq məhv edilmişdir. Bu müddət ərzində Amerika, Rusiya və Fransanın iştirakı ilə yaradılan Minsk qrupu münaqişənin həll edilməsi ilə bağlı heç bir nəticəyə nail olmamış, münaqişənin ədalətli, Azərbaycanın ərazi bütövlüyünün təmin olunması formatında həllində səylərin dəstəklənməsi və beynəlxalq hüququn prinsiplərinin təmin edilməsi üçün zəruri addımlar atmamışdır.
Beynəlxalq Avrasiya Mətbuat Fondu BMT Əsas Məşvərətçi Statuslu üzvü kimi bu günədək işğal altındakı ərazilərin azad olunması, işğal nəticəsində insanların pozulmuş hüquqlarının bərpa olunması, Cenevrə Konvensiyasının tələblərinin yerinə yetirilməsi istiqamətində beynəlxalq qurumlara dəfələrlə bəyanatla müraciət etmiş, Azərbaycanın ərazi bütövlüyünün təmin olunmasına çağırışlar etmişdir.
Bu gün Azərbaycan Respublikasının işğal olunmuş ərazilərin azad olunması ilə bağlı apardığı uğurlu hərbi əməliyyatlar super güclərin və xüsusən Minsk Qrupu ölkələrini narahat etməyə başlamışdır. Hesab edirik ki, Azərbaycanın beynəlxalq hüququn normalarına uyğun olaraq öz ərazi bütövlüyünü bərpa etmək, milliyətindən, dinindən asılı olmayaraq insanların təhlükəsiz yaşamasını təmin etmək hüququ vardır. Dağlıq Qarabağda yaşayan erməni vətəndaşlarını öz girovunda saxlayan və öz məkrli siyasətlərinə, quldur və vandal əməllərinə şərik edən Ermənistanın məsuliyyətsiz və yırtıcı siyasəti , eləcə də müxtəlif dövlətlərin, beynəlxalq qurumların, media təsisatlarının Dağlıq Qarabağda yaradılan qondarma quruma qarşı göstərilən ilginin heç bir bəraəti yoxdur. Beynəlxalq hüququn yurisdikasiyasından kənarda saxlanılan bu bölgədə müxtəlif dövlətlərin qanunsuz əməllərinin ifşa edilməsi, cinayətkarlığın qarşısının alınması zamanı çoxdan çatmışdır. Hesab edirik ki, beynəlxalq aləmdə Azərbaycanın tarixi əraziləri kimi tanınan bu bölgədə, işğalın durdurulmaması, vandalizm aktlarına göz yumulması, o cümlədən haqqın və ədalətin pozulmasına verilən rəvac maraqlı dövlətlərin feodal təfəkkürünə xidmət edir.
Minsk qrupu ölkələri rəhbərlərinin, xüsusən Fransa baş naziri Emmanuel Makronun son günlər Azərbaycan tərəfinin bu bölgədə həyata keçirdiyi əməliyyatlara sətiraltı qara yaxan, işğalçını dəstəkləyən bəyanatları terrozimə qarşı aparılan mübarizənin durdurulması çağırışları, çoxəsrlik Fransa Azərbaycan münasibətlərinə ciddi kölgə salır, bu ölkənin beynəlxalq imicinə mənfi təsir edir. Təcavüzkarın bir siması vardır. Bu gün dünya dövlətlərinin ikili sifəti, hər bir əməlin adı ilə çağrılmaması bəşəriyyətin qorunması istiqamətində atılan addımlara təhlükə törədir. Bu günkü dünyamızda yalnız müxtəlif terrorçu qruplaşmaları, separatçı və ekstremist qüvvələrin fəaliyyətinə qarşı birlikdə mübarizə ilə dayanqılı inkişafa, sülhə və barışa nail olmaq mümkündür. Bu mənada ümid edirik ki, Cənubi Qafqazda sabitliyin əldə olunması üçün Ermənistanın işğalçılıq siyasətinin qarşısı nəhayət ki, alınacaq insanların sülh və barış şəraitində yaşaması üçün beynəlxalq birliyin səyləri gücləndiriləcək.
