“Birmənalı olaraq demək olmaz ki, xəstəliyin sayının artmasının səbəbi yalnız məktəbdir və ya sadəcə ictimai nəqliyyatdır”.
Eurasia Diary-nin APA-ya istinadən məlumatına görə, bunu bu gün Nazirlər Kabineti yanında Operativ Qərargahın təşkil etdiyi mətbuat konfransında TƏBİB-in xəstəliklərin profilaktikası və kontrolu şöbəsinin müdiri Yaqut Qarayeva bildirib.
Onun sözlərinə görə, bu səbəbdən Tədbirlər Planı hazırlananda və tədbirlər görüləndə bir neçə istiqamətdə iş aparılır: “Koronavirusla mübarizə baxımından hamımız rahatlamışdıq. Bunu yalnız məktəblərdə aparılan dərslərlə bağlamaq olmaz, bu, bizim hər birimizə aiddir. Məktəbdə işləyən müəllimlərin də ailə üzvləri var, hansı ki, onlar da ictimai nəqliyyatdan istifadə edir, ayrı-ayrı müəssisələrdə işləyirlər və s. Onlar da bu infeksiyanı gətirib məktəbdə işləyən müəllimi yoluxdura bilərlər. Virusun coğrafiyasından danışanda, bildiyiniz kimi, biz lokal qapanmalara getmişik. Bunun əsasında da görə bilərsiniz ki, hansı bölgələrdə hazırda ciddi yoluxmalar var. Hansısa rayonda, kənddə yoluxmanın çoxluğunu aşkarlayanda, çalışırıq, tez bir zamanda o yeri bağlayaq ki, yayılma başqa bölgələrimizdə baş verməsin.
Şöbə müdiri qeyd edib ki, yoluxmalarla əlaqəli dalğa termini mediada çox istifadə olunur.
"Epidemioloji olaraq dalğa terminindən istifadə etməməyə çalışılır: "Bilirsiz ki, sentyabrı nisbi olaraq rahat keçirtmişdik. Bizim yoluxma sayımız 100-ün ətrafında olub. Artıq yoluxma sayının artmasını deyə bilərik. Payız-qış mövsümünün gəlməsi, havaların soyuması ilə əlaqədar ümumiyyətlə hər zaman respirator virus infeksiyasiyalarına yoluxma saylarında artma müşahidə olunur. Bu, əslində gözlənilən və proqnozlaşdırılan bir artış idi.
Onun sözlərinə görə, test sayları həftə sonu azalır.
Y. Qarayeva deyib ki, COVID-19 xəstəliyinə qarşı peyvəndlərlə bağlı Azərbaycan həm ikitərəfli, həm də çoxtərəfli PROVAX proyektinin iştirakçısıdır.
"Dünyada vaksinlərlə bağlı gedən araşdırmaları çox yaxından izləyirlər: “Hazırda hansı peyvənd namizədinin uyğun olacağını demək çox tezdir. Bəzi peyvənd namizədləri ikinci mərhələni bitirib üçüncü araşdırma mərhələsinə keçəndə çox ümidverici olur. Amma insanlarda onun istifadəsi başlayanda orada hər hansı fəsadlar və insanlar üzərində əks-təsirlər qeyd olunur. Ona görə bu gün hansısa zaman vermək çox tezdir. Hələ tam bütün mərhələləri bitirən və hansısa beynəlxalq təşkilatlar tərəfindən təsdiq olunan vaksin yoxdur. Amma biz ölkə olaraq bütün prosesləri yaxından izləyirik və bütün proseslərin artıq iştirakçısıyıq. Əgər elə bir vaksin təsdiq olunarsa, o vaksini əldə edə biləcək ölkələrin sırasındayıq”.
Y. Qarayeva bildirib ki, hazırda cəbhədə xeyli həkim var.
"Müharibədə hərbi həkimlər də itirmişik. Biz onlarla fəxr edirik. Onlar böyük səhiyyə ailəsinin üzvləridir”.
