"Ayağımdan bir əl yapışdı, gördüm ki, qızımdır..." - Ermənilərin hücumundan zərər çəkən sakinimiz - FOTOLAR | Eurasia Diary - ednews.net

6 Dekabr,


"Ayağımdan bir əl yapışdı, gördüm ki, qızımdır..." - Ermənilərin hücumundan zərər çəkən sakinimiz - FOTOLAR

Cəmiyyət A- A A+

Ermənistan Silahlı Qüvvələri Azərbaycanın dinc rayon və kəndlərini atəşə tutmaqda davam edir. Xüsusilə, cəbhəyanı bölgələrdə mülki əhali və obyektlərə dəyən maddi və mənəvi zərərin miqyası hər gün artmaqdadır.

Eurasia Diary düşmənin hücumlarından zərər çəkən vətəndaşlarımızdan biri olan Beyləqan sakini Mais Məmmədovun başına gələnləri oxuyuculara təqdim edir.

Beləki, oktyabrın 3-də Beyləqan rayonunun ermənilər tərəfindən ağır artilleriya atəşinə məruz qalması nəticəsində rayon sakini, məcburi köçkün Məmmədov Maisə məxsus evin həyətinə iriçaplı mərmi düşüb. Hadisə nəticəsində həyətyanı sahə alt-üst olub, ev təmamilə dağılıb. Ailənin iki üzvü, ana Zalova Yeganə və qızı Məmmədova Sevinc, eləcə də qonşuda bir ana öz övladı ilə həyətdə durarkən xəsarət alıblar.

Mais Məmmədovun sözlərinə görə, həmin axşam oğlu 19 yaşlı Çərkəz ilə evindən bir qədər aralıda olub. Bu zaman evi istiqamətində mərminin düşdüyünü görüb. Ata oğlu ilə evlərinə doğru qaçıblar. Partlayışdan sonra evlərdə sakinlər işıqları söndürüb. O, dağıntıların arasından həyəcanla ora-bura qaçarkən qızını və yoldaşını səsləsə də, çağırışına cavab gəlməyib.

Mais söyləyir ki, həmin an qəfildən ayağından bir əl yapışıb və görüb ki, qızı Sevincdir. Ata qaranlıqda telefonun işığı altında torpağı əlləriylə qazıb və qızını xilas edib. Daha sonra həyat yoldaşı Yeganəni də torpağın altından çıxara bilib, lakin havasızlıqdan boğulduğu üçün süni nəfəslə onu həyata qaytarmaq mümkün olub.

Partlayış anında ana ilə qızı əl-ələ tutublar və evin düz qarşısında torpağın bir metr dərinlikdə altına düşüblər. Ananın ayaqları, qızın isə bel-çanaq sümüyü sınıb. Tezliklə təcili yardım maşını gəlib və onları aparıb. Hazırda yaralılar Bakıda həkimin nəzarəti altındadırlar. Həkim Sevincə bir ay yataqdan durmamağı tövsiyyə edib. Yeganənin isə ayaqları gipsdədir.

Mais və oğlu Çərkəz gördükləri dəhşətdən böyük travma alıblar. Onlar gələndə ev tam dağılmış vəziyyətdə olub və demək olar ki, evdən əsər-əlamət yoxdur. Partlayışdan yaranan çuxur o qədər dərin olub ki, hətta yerdən su çıxıb.

Qeyd edək ki, Mais Məmmədov Qarabağ qazisidir, fiziki qüsurludur. Həyat yoldaşı Yeganə müəllimədir. Sevinc və qardaşı Çərkəz tələbədirlər. Ailənin sosial durumu ağırdır. İndi Sevinc qardaşı ilə xalasıgildə kirayədə qalır. Ata və ana isə digər bir qohumun evində yataqxanada qalırlar. Yəqin ki, dövlət tərəfindən dəstək olacaq.

Mais və Yeganə şükür edirlər ki, salamatdırlar. Nəzərə alaq ki, onlar məcburi köçkündürlər və ordumuzun uğurlu əməliyyatları dağıdılmış evin təəssüfünü onlara doğma evlərini qaytarmaqla unutdurur. Elə hər ikisi də bu fikri səsləndirərərək deyiblər ki, təki dağılan evlərimiz olsun, amma ordumuz sağ olsun və torpaqlarımız qayıtsın.

Məmmədovlar ailəsi əslən Füzuli rayonundandırlar. Bu kədərli günlərində Füzulinin alınması xəbəri onlara böyük sevinc gətirdi. İnanıram ki, işğal altında olan bütün torpaqlarımız geri qayıdanda bu hadisələri, eləcə də Gəncə hadisələrini unudacayıq. İnşallah, həmin gün uzaqda deyil. Yəqin ki, biz yaxın zamanda ordumuzun tam qələbə xəbəri ilə sevinəcəyik.

Gülnar Səlimova

1

1

1

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...