Füzuli rayonunun Ordumuz tərəfindən işğaldan azad edilməsi ilə əlaqədar Qarabağ qaziləri və Füzuli rayonundan olan sakinlər Şəhidlər Xiyabanını ziyarət edib. Tədbirdə Füzuli rayon ziyalıları, Qarabağ qaziləri Elçin Rəfiyev, Faiq Quliyev, eləcə də Milli Qəhrəman Elxan Zülfüqarovun qardaşı Mübariz Zülfüqarov, sosioloq Zəminə Səfərova və digər ziyalılar iştirak ediblər. Onlar Birinci Qarabağ müharibəsində şəhid olanların məzarları üzərinə gül dəstələri qoyublar. Həmçinin, 1992-ci ildə Füzuli uğrunda gedən döyüşlərdə qəhrəmancasına həlak olan Azərbaycanın Milli Qəhrəmanı, kəşfiyyatçı kapitan Elxan Zülfüqarovun məzarını ziyarət ediblər. Döyüş yoldaşları onunla bağlı xatirələrini bölüşüblər.
Mina Qurbanlarının Sosial və İqtisadi Problemlərinin Həllinə Kömək İctimai Birliyinin sədri, Qarabağ qazisi Məmmədhəsən Həsənov çıxışında milli qəhrəmanla bağlı ürək sözlərini dilə gətirib.
“Bu gün biz tarix yazırıq. Bu tarixi sonacan yazmalıyıq. Allah Azərbaycan Ordusuna qüvvət versin! Bu gün döyüşənlərin hamısı bizim övladlarımızdır. Birinci Qarabağ müharibəsində şəhid olan qardaşlarımızın övladları indi şəhid olur. Bizi sevindirən odur ki, onlar işğal edilən torpaqları azad edir. Həmin torpaqları biz almalı idik, amma onlar da bizim bir parçamızdır.
Bu gün Elxanın əzizləri də burada yanımızdadır. Mən bilirəm ki, Elxanın Şuşa ilə bağlı xatirələri olub. Qarabağın paytaxtı Şuşa idi. Gün o gün olsun ki, Şuşada zəfərimizi qeyd edək. Allah Elxanın simasında bütün şəhidlərimizə rəhmət eləsin! Ruhları şad olsun!”