Füzuli ziyalılarından Ali Baş Komandana müraciət: "Ürəklərdə qələbə şövqü yaşatdığınız üçün Sizə minnətdarıq !"

Cəmiyyət 14:00 03.11.2020

Oxunma sayı: 727

... XALQIMIZ TARİXİ GÜNLƏRƏ ŞAHİDLİK EDİR!

Şanlı Azərbaycan ordusunun böyük şücaət və xüsusi peşəkarlıqla həyata keçirdiyi döyüş əməliyyatları nəticəsində düşmən tapdağı altında qalmış tarixi Azərbaycan torpaqlarının - Füzulinin, Cəbrayılın, Zəngilanın, Xocavəndin, Hadrutun, Qubadlının, Tərtərin, Murov yüsəkliklərinin bir çox əhəmiyyətli hissələri işğaldan azad edilmişdir. Üçrəngli Azərbaycan bayrağı azad olunmuş həmin doğma ərazilərimizdə, eləcə də xalqımızın tarixi birlik və qəhrəmanlıq simvolu olan Xudafərin körpüsü üzərində qürurla dalğalanmaqdadır. Hazırda işğal altında qalan digər ərazilərimizin də erməni tapdağından azad edilməsi istiqamətində döyüş əməliyyatları əzmkarlıqla davam etdirilir və inanırıq ki, yaxın vaxtlarda BÖYÜK QƏLƏBƏYLƏ başa çatdırılacaqdır. Azərbaycan xalqı cəbhədə ordumuzun qələbələrinə öz töhfəsini vermək üçün Ali Baş Komandanın, Prezident İlham Əliyevin ətrafında vahid yumruq kimi birləşmişdir. Əldə etdiyimiz qələbə sevincini bölüşmək və minnətdarlıq hisslərini Ölkə rəhbərinə çatdırmaq üçün bir qrup Füzuli ziyalısı rayon ictimaiyyəti adından Ölkə Prezidentinə müraciət ünvanlamışdır.

Eurasia Diary xəbər verir ki, müraciətdə deyilir:

"Hörmətli CƏNAB PREZİDENT, CƏNAB ALİ BAŞ KOMANDAN !

İşğal altında olan torpaqlarımızın kəndlərimizin, şəhərlərimizin bir-birinin ardınca azad olunması üçün nümayiş etdirdiyiniz möhkəm iradə və qətiyyətinizlə qürur duyur, fəxr edirik ! Bu gün xalqımızın illər ərzində davam edən iztirabına son qoyulur, torpaqlarımız işğaldan azad edilir. Uzun illərin həsrətindən sonra gözlərdə sevinc göz yaşları, ürəklərdə qələbə şövqü yaşatdığınız üçün Füzuli rayon ziyalıları adından Sizə minnətdarıq cənab Prezident !

Sizin ümumxalq çağırışınız, müdrikliyiniz, sərkərdəlik qabiliyyətiniz sayəsində ölkəmizdə uşaqdan böyüyə hər kəs Vətən Müharibəsinə müsəlləh əsgər kimi səfərbər olundu. Heç bir kənar qüvvə Sizin xalqla birgə vəhdətinizə təsir göstərə bilmədi. Bilirik ki, torpaqlarımızın azadlığı qansız-qadasız, itkilərsiz mümkün deyildir. Torpaq, uğrunda ölən varsa vətəndir. Sizin qələbə xəbərləriniz hər bir evdə, hər bir eşikdə müjdə oldu, insanlarımızın ümid yeri, xalqımızın hər bir nümayəndəsi üçün təsəlli oldu. Uzun müddət doğma yurdundan-yuvasından didərgin düşmüş insanlar üçün qələbə xəbərindən gözəl nə ola bilərdi. Biz tarixi bir dövrü yaşayırıq. Elə bir tarixi dövrü ki, tarixi ədalət bərpa edilir. Gələcək nəsillərimiz Sizin Ali Komandanlığınızla torpaqlarımızın işğal altından azad olunması üçün aparılan Vətən Müharibəsini, millətimizin qürur yeri, şərəf məsələsi, kitablarımızın istinad, gənclərimizin öyünc yeri kimi daim xatırlayacaq.

Cənab Ali Baş Komandan, Hörmətli Prezident !

Vətənimizin hər bir guşəsi bizimçün əzizdir, doğmadır. Amma insanın doğulduğu yurd-yuvanın, ocağın, elin, obanın fərqli bir anlamı var. Həmin yerlərdə yaşanan xoş xatirələr, dədə-babalarımızın ruhu yuxu kimi heç zaman bizi rahat buraxmadı. Bu nisgili, bu qürbəti, bu kədəri götürdünüz üzərimizdən Cənab Prezident.

Sizin Adınız, Sizin surətiniz işğaldan azad olunmuş bütün torpaqlarımızda Ərgünəş dağı, Məngəlanata kimi zirvələrdə heykəlləşəcək. Bu günləri, bu tarixi dövrü bizə yaşatdığınız üçün Sizə minnətdarıq! Biz hər zaman Sizinləyik ! Sizin qələbələriniz dönməzdir, dönülməzdir ! Allah Sizi və ailənizi qorusun ! Allah Ordumuzu və xalqımızı qorusun! Allah Sizə yar olsun !

***

Var olsun Azərbaycan! Var olsun Qarabağ! QARABAĞ AZƏRBAYCANDIR!

Füzuli rayon əhalisi və ziyalıları adından:

1. Akademik Hətəm Quliyev

2. AMEA m. üzvü, professor Arif Quliyev

3. AMEA m. üzvü, professor Akif Musayev

4. AMEA m. üzvü, professor Əli Nuriyev

5. Yazıçı Seyran Səxavət

6. Şair Vaqif Bəhmənli

7. Şair Çingiz Əlioğlu

8. Şair Cavad Zeynal

9. Nəbi Muxtarov