"İşğaldan azad olunmuş ərazilərə nəzarət edilir. Bütün yollarda, bütün keçidlərdə polis tərəfindən mühafizə zolaqları qurulub, postlar yerləşdirilib".

Eurasia Diary xəbər verir ki, bunu Azərbaycan Respublikası Ərazilərin Minalardan Təmizlənməsi üzrə Milli Agentliyin (ANAMA) Operativ Qərargah rəisi İdris İsmayılov bildirib.

İ. İsmayılov qeyd edib ki, bu ərazilər çox böyükdür: “Şəxsi kontingent zəruri olan tədbirləri görür. Mülki əhalidən xahiş edirəm ki, həmin ərazilərə getməsinlər. Bu, onların özü üçün, ailəsi üçün təhlükəlidir. Biz bu ərazilərə nəzarət etmək üçün əlimizdən gələni edirik, polis tərəfindən nəzarət nə qədər mümkündür edilir. Amma oraya gedən insanlar dağlardan, digər yollardan istifadə edirlər. Ona nəzarət etmək çox çətindir. İmkan daxilində biz qısa müddət ərzində həmin əraziləri təmizləyəcəyik və insanların həmin ərazilərə getməsi üçün şərait yaradacağıq. Əhalinin doğma torpaqlarına, evlərinə, dədə-baba torpaqlarına getməsi üçün şərait yaradıldıqdan sonra təlimat veriləcək ki, onlar bu əraziləri ziyarət etsinlər".

İ. İsmayılov deyib ki, шşğaldan azad olunmuş ərazilərin 80 faizi partlayıcı maddələr baxımından təhlükəli ərazilərdir.

“İnsanların ata-baba yurdlarına qayıtması üçün infrastruktur obyektlərində, əhalinin qayıtması üçün zəruri olan məkanlarda minalardan təmizləmə işləri aparılacaq. Daha sonra otlaq, əkin sahələrində, sonra ucqar ərazilər təmizlənəcək”.

O, bildirib ki, Şuşaya yolun, elektrik xətlərinin və su kəmərinin çəkiləcəyi ərazilərin minalardan təmizlənməsinə başlanıb.

"Bu istiqamətdə işlər artıq bir neçə gündür ki, davam edir. Ancaq bu işlərin hansı müddətdə yekunlaşacağını söyləmək çətindir. Çünki ərazi mürəkkəb relyefə malikdir, partlayıcı maddələr, əsasən, əllə təmizlənir”.