5 dekabr Beynəlxalq Könüllülər Günüdür. Bu münasibətlə Azərbaycan Respublikası Prezidenti yanında QHT-lərə Dövlət Dəstəyi Şurasının dəstəyi ilə Beynəlxalq Avrasiya Mətbuat Fondu (BAMF) tərəfindən həyata keçirilən “QHT-lərin beynəlxalq təşkilatlarla əlaqələri və könüllülük fəaliyyətinin təşviqi” layihəsi çərçivəsində “Könüllülük fəaliyyətinin əhəmiyyəti və perspektivləri” mövzusunda onlayn konfrans keçirilib.
Konfransı giriş sözü ilə açan BAMF prezidenti Umud Mirzəyev 2020-ci ilin ölkə rəhbəri tərəfindən "Könüllülər ili" elan olunmasının əhəmiyyətindən, zəfərlə başa çatan Vətən Müharibəsində könüllülərimizin rəşadətindən, könüllü olmanın vətənə, dövlətə faydasından söz açıb. “BAMF bu günə kimi yüzdən çox xarici könüllüyə ev sahibliyi edib. Vətən Müharibəsi dövründə onların hər birisi Azərbaycanı sevən insanlar kimi, ölkəmizin haqq işinə dəstək nümayiş etdirib”, deyə U. Mirzəyev bildirib.
Nigeriyadan olan və vaxtı ilə BAMF-da könüllü fəaliyyət göstərmiş, təhsil üzrə ekspert Nik Nvolisa könüllü fəaliyyətin gənclərin özlərini kəşf etməsi baxımından, könüllü işin cəmiyyətə verdiyi faydalar, beynəlxalq qurumlarda könüllü fəaliyyətin əhəmiyyətini qeyd edib.
“Ümid” Sosial Humanitar Təşkilatın rəhbəri İsrail İsgəndərov gəncləri könüllü fəaliyyətə təşviq edərək, bu sahədə geniş bilikləri olan təşkilatların təcrübəsindən yararlanmağın əhəmiyyətindən söz açıb. BAMF-ın və bir sıra digər vətəndaş cəmiyyəti qurumlarının fəaliyyətini örnək olaraq təqdim edib.
Tədbirdə çıxış edən “Təmiz Dünya” İctimai Birliyinin sədri Mehriban Zeynalova vətəndaş cəmiyyəti qurumlarının, qadınların inkişaf etdirilməsi üçün görülən könüllü fəaliyyətdən söz açaraq bu istiqamətdə dövlətimizin və cəmiyyətimizin birgə fəaliyyətini yüksək qiymətləndirdiyini bildirib. O, BAMF-ın təcrübəsinin könüllü fəaliyyətə başlayanlar üçün nümunə olduğunu qeyd edib.
“Sağlamlığa Xidmət” İctimai Birliyinin sədri Elçin Muxtarlı gənclərin könüllü fəaliyyətinin onların gələcək peşə fəaliyyətindəki rolundan danışıb, könüllülük fəaliyyətinin cəmiyyətin həssas qruplarının dəstəklənməsində xüsusi rolu olduğunu bildirib.
“Azərbaycan Jurnalistlər Şəbəkəsi” İB-nin sədri Ayaz Mirzəyev könüllü fəaliyyətin başlanılmasında insanlara təmənnasız xidmətlərdən söz açıb, Vətən Müharibəsi dövründə gənclərimizin könüllü olaraq hərbi xidmətə yazılması, arxa cəbhədə könüllü fəaliyyət, belə bir çətin dövrdə xalqımızın yüksək milli-mənəvi dəyərlər nümayiş etdirməsi, müharibə dövründə bir millət olaraq hamılıqla könüllü olmağımızdan qürurlu olduğunu qeyd edib.
BAMF könüllüsü Tatenda Moduro qaçqın və məcburi köçkünlərin, aztəminatlı insanların dəstəklənməsi üçün könüllü fəaliyyətinin əhəmiyyətini qeyd edib. O, bu sahədə BAMF-ın uzun illərdən bəri əldə etdiyi geniş təcrübənin faydasından, sosial-humanitar proqramların könüllü fəaliyyət üçün yaratdığı imkanlardan söz açıb.
QHT Şurasının təsis etdiyi “Səlis Könüllülər” İB-nin sədri, Azərbaycan Gənclərinə Dəstək Proqramının gənclərlə iş üzrə koordinatoru Xudaverdi Quliyev Vətən Müharibəsi dövründə informasiya müharibəsi zamanı sosial mediada gənclərimizin aktiv fəaliyyətindən, könüllü qrupların haqq işimizə göstərdiyi dəstəyin əhəmiyyətindən danışıb. Bu istiqamətdə BAMF-ın təcrübəsini xüsusi olaraq qeyd edib.
Tədbir çərçivəsində BAMF tərəfindən hazırlanan “Bizim Könüllülər” sosial çarxı iştirakçıların diqqətinə çatdırılıb. Sosial çarxda Vyetnam, Portuqaliya, Nigeriya, İtaliya, Mozambikdən olan könüllülərin ölkəmizə dəstək mesajları və Beynəlxalq Avrasiya Mətbuat Fondunun onların həyatındakı rolunun əhəmiyyətindən söz açılır. Qeyd edək ki, tədbirdə 50-yə yaxın vətəndaş cəmiyyəti təmsilçisi, könüllü qrupların nümayəndələri, gənclər təşkilatları, ictimai fəallar iştirak edib.
BAMF Mətbuat xidməti