Azərbaycanın müharibədən zərərçəkən regionlarında fəaliyyət göstərən bir qrup vətəndaş cəmiyyəti təşkilatı dünyaca məşhur www.change.org saytında Ermənistana qarşı petisiyaya ilə çıxış edib. Bu barədə petisiyanın əsas təşəbbüsçülərindən olan BMT-nin İqtisadi Sosial Şurasının (ECOSOC) Əsas Məşvərətçi Statuslu üzvü olan Beynəlxalq Avrasiya Mətbuat Fondunun prezidenti məlumat verib.
Petisiya Azərbaycanın Dağlıq Qarabağ və ətraf rayonlarının təxminən otuz illik işğalı, habelə münaqişənin bitməsindən sonrakı dövrdə Ermənistan hərbi birləşmələrinin geri çəkildiyi zaman bu əraziləri ciddi şəkildə minalaması və minalanmış ərazilərin xəritələrini verməkdən imtina etməsinə qarşı etiraz çağırışıdır. Sənəddə deyilir: “Ermənistan bu minaların harada qoyulduğunu bilir, lakin bu məlumatları yaymaqdan imtina edir. Məcburi köçkün ailələrini qorxu içində saxlayaraq öz evlərinə qayıtmasına əngəl olmağa çalışan Ermənistan bu sirrin açarını gizlədir”.
Azərbaycan xarici işlər naziri 22 fevral 2021-ci il tarixdə Birləşmiş Millətlər Təşkilatından Ermənistanı azad edilmiş ərazilərdə minaların yerlərini bildirməyə çağırılması təklifi ilə çıxış edib.
Petisiya həmin sənədə istinad edərək dünya dövlətlərini, beynəlxalq təşkilatları, media qurumlarını Azərbaycanın üzləşdiyi mina probleminə yönəltmək üçün çoxsaylı insanların change.org saytında birgə etiraz çağırışıdır. Qeyd edək ki, dünyaca ünlü change.org saytının yarım milyarda yaxın abunəçisi vardır. Sayt üzərindən qaldırılmış məsələlər 196 ölkədə 72.807 uğura nail olub.
Azərbaycan vətəndaşları da https://www.change.org/p/republic-of-armenia-urge-armenia-release-the-map-of-landmines-in-liberated-areas-of-azerbaijan-to-save-lives saytına daxil olub, petisiyaya imza ata bilər. Bu petisiyanı imzalamaqla Ermənistanı minalanmış ərazilərə dair xəritələri üzə çıxartmağa çağırmağınız çox sayda günahsız insan itkisinin qarşısını ala bilər. Bu insanların zərərsizləşdirilməsi mümkün olan həmin minalara düşərək həyatlarını itirmək və ağır yaralanmaq qorxusu olmadan yaşamaq hüququ vardır.
Qeyd edək ki, petisiyaya qoşulan vətəndaş cəmiyyəti qurumları Beynəlxalq Avrasiya Mətbuat Fondunun prezidenti Umud Mirzəyev, Azərbaycan Minadanzərərçəkənlər Assosiasiyasının sədri Rey Kərimoğlu, “Minalar Əleyhinə Azərbaycan Kampaniyası” İB-nin sədri Hafiz Səfixanov, “Dayaq” Qeyri Hökumət Humanitar Təşkilatının sədri Şahin İbrahimov, “Mina Qurbanlarının Sosial-İqtisadi Problemlərinin Həllinə Kömək” İB-nin sədri Məmmədhəsən Həsənov 25 mart 2021-ci il tarixdə erməni hərbi birləşmələri tərəfindən minalanmış Azərbaycan ərazilərinin xəritələrinin tələb edilməsi ilə bağlı beynəlxalq qurumlara müraciət edib.
Petisiyanın azərbaycan dilində mətnini təqdim edirik:
Azərbaycanın ərazilərinin təxminən otuz illik işğalı, habelə münaqişənin bitməsindən sonrakı dövrdə Ermənistan hərbi birləşmələrinin geri çəkildiyi zaman bu ərazilər təhlükəli minalarla çirkləndirilib.
Didərgin həyatdan yorulmuş Azərbaycanlı məcburi köçkün ailələri, 30 ildən sonra yeni həyat qurmaq üçün evlərinə qayıdırlar və mina təhlüksəi ilə üz-üzə qalırlar.
Ən əsası, Ermənistan bu minaların harada qoyulduğunu bilir, lakin bu məlumatları yaymaqdan imtina edir. Məcburi köçkün ailələrini qorxu içində saxlayaraq öz evlərinə qayıtmasına əngəl olmağa çalışan Ermənistan bu sirrin açarını gizlədir.
Bu petisiyanı imzalamaqla Ermənistanı minalanmış ərazilərə dair xəritələri üzə çıxartmağa çağırmağınız çox sayda günahsız insan itkisinin qarşısını ala bilər. Bu insanların zərərsizləşdirilməsi mümkün olan həmin minalara düşərək həyatlarını itirmək və ağır yaralanmaq qorxusu olmadan yaşamaq hüququ vardır.
Bu nə üçün vacibdir?
(Münaqişə bitəndən bəri 9-u mülki şəxs olmaqla 20 Azərbaycan vətəndaşı mina partlayışları nəticəsində həyatını itirib. 8 nəfər mülki şəxs olmaqla daha 85 vətəndaş ağır yaralanıb. Mina qurbanı olan 20 insanın həyatı xilas edilə bilərdi: İnsan həyatına bais olan Ermənistanın basdırdığı minalar müharibə cinayətidir.)
Azərbaycan Xarici İşlər Naziri 22 fevral 2021-ci il tarixdə Birləşmiş Millətlər Təşkilatından Ermənistanı azad edilmiş ərazilərdə minaların yerlərini bildirməyə çağırması təklifi ilə çıxış edib.
Bu petisiyanı imzalayanlar günahsız ailələrə və icmalara dinc yaşamaq imkanı yaratmaq üçün bir daha Ermənistan hökumətini minaların yerləşdiyi yerləri göstərməyə çağırırlar. Ermənistanın bunu etməməsi müharibə cinayətidir.
BAMF Mətbuat xidməti