Bu gün Beynəlxalq Avrasiya Mətbuat Fondunun ofisində Azərbaycanın müharibədən zərərçəkən regionlarında fəaliyyət göstərən bir qrup vətəndaş cəmiyyəti təşkilatı dünyaca məşhur www.change.org saytında Ermənistana qarşı petisiyaya ilə çıxış edib. Petisiya Azərbaycanın Dağlıq Qarabağ və ətraf rayonlarının təxminən otuz illik işğalı, habelə münaqişənin bitməsindən sonrakı dövrdə Ermənistan hərbi birləşmələrinin geri çəkildiyi zaman bu əraziləri ciddi şəkildə minalaması və minalanmış ərazilərin xəritələrini verməkdən imtina etməsinə qarşı etiraz çağırışıdır.
Eurasia Diary xəbər verir ki, tədbirdə çıxış edən Beynəlxalq Avrasiya Mətbuat Fondunun Prezidenti Umud Mirzəyev bildirib ki, Ermənistan 9 noyabrda kapitulyasiya aktı imzalayandan sonra mina problemi ən böyük problem olaraq qalır: “İşğaldan azad olunmuş ərazilərdə çox böyük mina çirklənməsi mövcuddur. Bildiyiniz kimi, istər Birinci, istərsə də İkinci Qarabağ savaşından sonra və ümumiyyətlə 30 illik dövr ərzində Qarabağ və ona bitişik yeddi rayonun ərazisi çox ciddi şəkildə minalanıb. Həmin ərazilərin dağıdılması, viran və talan edilməsi, yandırılması, ekoloji terrora məruz qalmasıyla yanaşı, ərazilər başdan-başa minalanıb, qadağan olunmuş böyük hərbi sursatlarla çirkləndirilib. Bununla bağlı martın 25-də beş vətəndaş cəmiyyəti qurumu bu auditoriyada toplaşdı və dünya dövləltərinə, beynəlxalq təşkilatlara mina xəritələrinin Azərbaycana verilməsində Ermənistana təsir göstərmələri üçün müraciət ünvanladı”.
.jpg)
U.Mirzəyevin sözlərinə görə, Ermənistan tərəfi kapitulyasiyadan dərhal sonra minalanmış ərazilərin xəritəsini təqdim etməli idi: “Lakin bu gün də Azərbaycan tərəfinə həmin xəritə təqdim olunmayıb. Azərbaycanın dövlət başçısı, eləcə də Xarici İşlər naziri bildirib ki, bu xəritələrin Azərbaycana verilməsi regionda sülhün və əminamanlığın bərpa olunması üçün çox vacibdir".
BAMF prezidenti qeyd edib ki, ötən gün Paşinyanın Rusiya prezidenti ilə görüşdə daha çox qabartdığı məsələlər sülhə xidmət etmir: “O, xəritələrlə bağlı bir kəlmə də söz etmədi. Əksinə, gündəmə gətirdiyi məsələ Azərbaycanda olan terrorçular, separatçılarla bağlı oldu”.
“Dayaq” Qeyri Hökumət Humanitar Təşkilatının sədri Şahin İbrahimovun sözlərinə görə, artıq heç kəsə sirr deyil ki, minalar bu gün Azərbaycanda ən böyük problemdir: "Mina xəritələrinin verilməməsi minaların təmizlənməsi, infrastruktur layihələrin həyata keçirilməsi prosesini və 30 illik torpaq həsrəti çəkən məcburi köçkünlərimizin öz evlərinə qayıtması prosesini ləngidir. Petisiyanın imzalanmasında məqsədimiz minalanmış ərazilərin xəritəsinin əldə edilməsidir. Digər bir məqsədimiz isə dinc və yanaşı yaşamaqdır. Bu xəritələr nə qədər tez verilərsə, Azərbaycan, Ermənistan və sonradan Gürcüstan da bu prosesə qoşularsa Cənubi Qafqaz və ümumiyyətlə dünya minalardan azad bir yerə çevrilər”.
“Mina Qurbanlarının Sosial-İqtisadi Problemlərinin Həllinə Kömək” İB-nin sədri Məmmədhəsən Həsənov qeyd edib ki, müharibə zamanı Ermənistan təxribatçı hərəkətləri ilə bizə mane olub: “Biz görürdük ki, minalar səpilir. İşğaldan azad edilmiş ərazilərə səfər zamanı yol kənarında bilbordları basdırarkən bir hərbi ambulansın çox sürətlə getdiyinin şahidi olduq. Üç hərbçi minaya düşmüşdü və ayaqlarını itirmişdilər. Ağdamda mülki vətəndaşa məxsus Şaqman maşınının ön hissəsi tank əleyhinə minaya düşmüşdü. Sürücü ağır xəsarət alsa da, xoşbəxtlikdən sağ qalmışdı. Bütün bunlar onu göstərir ki, mina təhlükəsi hələ də davam edir. Biz beş təşkilat müraciət edirik ki, Ermənistan xəritələri Azərbaycan tərəfinə qaytarsın və biz mina bəlasından qurtula bilək”.
Daha sonra QHT rəhbərləri jurnalistlərin suallarını cavablandırıb.
