BMT-nin Azərbaycandakı nümayəndəliyinin münaqişədən zərər çəkmiş Bərdə, Ağdam və Tərtər rayonlarına üç günlük səfəri başa çatıb. Səfərin əsas məqsədi BMT-nin bu rayonlarda gördüyü işləri, cari humanitar ehtiyacları, eləcə də fəaliyyətlərin əlaqələndirilməsini müzakirə etmək idi.

Nümayəndəlikdən Trend-ə bildirilib ki, səfər iştirakçıları yerli icra hakimiyyətlərinin başçıları və münaqişədən əziyyət çəkmiş icmaların nümayəndələri ilə görüşüblər.

Hərbi əməliyyatlar dayandırıldıqdan sonra BMT-nin Azərbaycandakı nümayəndəliyi münaqişə nəticəsində müvəqqəti olaraq yaşayış yerlərini tərk etmiş əhalinin vacib humanitar ehtiyaclarını qarşılamaq üçün təxirəsalınmaz tədbirlərə başlayıb. Ərzaq, sığınacaq, gigiyena, mina riski ilə bağlı maarifləndirmə, səhiyyə xidmətlərinin göstərilməsi, psixoloji və sosial dəstək, habelə təhsil sahələrində vacib ehtiyacları müəyyənləşdirmək və prioritetləşdirmək üçün BMT Azərbaycan hökuməti ilə sıx əməkdaşlıq çərçivəsində ehtiyacların dəyərləndirilməsi üçün bir neçə missiya həyata keçirib.

Humanitar fəaliyyəti dəstəkləmək üçün BMT-nin Azərbaycanda fəaliyyət göstərən agentliklərinin maliyyə vəsaiti ilə yanaşı, təşkilatın Humanitar Məsələlərin Əlaqələndirilməsi Ofisi (UN OCHA) Vahid Təcili Yardım Fondundan (CERF) 2 milyon ABŞ dolları ayırıb.