Azərbaycanın müharibədən zərərçəkən regionlarında fəaliyyət göstərən bir qrup vətəndaş cəmiyyəti təşkilatı bir müddət əvvəl dünyaca məşhur www.change.orq saytında Ermənistana qarşı petisiya ilə çıxış edib. Bu gün ölkəmizin tanınmış ictimai xadimləri Çingiz Abdullayev, Azər Qəribov, eləcə də israilli beynəlxalq ekspert Arye Qut hər kəsi bu petisiyaya qoşulmağa çağırıblar.
Bu barədə petisiyanın əsas təşəbbüsçülərindən olan BMT-nin İqtisadi Sosial Şurasının (ECOSOC) Əsas Məşvərətçi Statuslu üzvü olan Beynəlxalq Avrasiya Mətbuat Fondunun prezidenti Umud Mirzəyev məlumat verib. Petisiya Azərbaycanın Dağlıq Qarabağ və ətraf rayonlarının təxminən 30 illik işğalı, habelə münaqişənin bitməsindən sonrakı dövrdə Ermənistan hərbi birləşmələrinin geri çəkildiyi zaman bu əraziləri ciddi şəkildə minalaması və minalanmış ərazilərin xəritələrini verməkdən imtina etməsinə qarşı etiraz çağırışıdır. Sənəddə deyilir: “Ermənistan minaların harada qoyulduğunu bilir, lakin müxtəlif bəhanələrlə bu məlumatları təqdim etməkdən imtina edir. 30 ildən sonra azərbaycanlı məcburi köçkünlər geri dönərək minaların içərisində özlərinə həyat qurmağa çalışır. Lakin müharibədən sonrakı dövr ərzində 85 nəfərdən çox azərbaycanlı minaya düşərək həlak olub və ya ağır yaralanıb”.
“Petisiya dünya dövlətlərini, beynəlxalq təşkilatları, media qurumlarını Azərbaycanın üzləşdiyi mina probleminə yönəltmək üçün çoxsaylı insanların www.change.org saytında birgə etiraz çağırışıdır. Artıq qısa müddət ərzində petisiyaya qoşulanların sayı 12.000 nəfəri keçib. Bu müddət ərzində 118,750 baxış və 20,880 paylaşım sayı qeydə alınıb. Hər dəqiqə artmaqda olan bu statistika dəstəyiniz və birliyimiz sayəsində bizi hədəfimizə daha da yaxınlaşdırır” deyə tədbir iştirakçıları bildirib.
Azərbaycan vətəndaşları da https://www.change.org/p/republic-of-armenia-urge-armenia-release-the-map-of-landmines-in-liberated-areas-of-azerbaijan-to-save-lives saytına daxil olub, petisiyaya imza ata bilər. “Bu petisiyanı imzalamaqla Ermənistanı minalanmış ərazilərə dair xəritələri üzə çıxartmağa çağırmağınız çox sayda günahsız insan itkisinin qarşısını ala bilər” deyə ictimai xadimlər media nümayəndələrinə, vətəndaş cəmiyyətinə və bütövlükdə ictimaiyyətə səsləniblər.
Qeyd edək ki, martın 25-də BMT-nin İqtisadi-Sosial Şurasının Əsas Məşvərətçi Statuslu üzvü olan Beynəlxalq Avrasiya Mətbuat Fondunun prezidenti Umud Mirzəyev, Azərbaycan Minadan zərərçəkənlər Assosiasiyasının sədri Rey Kərimoğlu, “Minalar Əleyhinə Azərbaycan Kampaniyası” İB-nin sədri Hafiz Səfixanov, “Dayaq” Qeyri Hökumət Humanitar Təşkilatının sədri Şahin İbrahimov, “Mina Qurbanlarının Sosial-İqtisadi Problemlərinin Həllinə Kömək“ İB-nin sədri Məmmədhəsən Həsənov erməni hərbi birləşmələri tərəfindən minalanmış Azərbaycan ərazilərinin xəritələrinin tələb edilməsi ilə bağlı beynəlxalq qurumlara bəyanatla müraciət ediblər. Aprelin 4-də onlar Ermənistana qarşı petisiya imzalayıb.
Tədbirdə iştirak edən vətəndaş cəmiyyəti qurumları və ictimai xadimlər dünya ictimaiyyətinə açıq məktub ünvanlayıb. BAMF isə öz tərəfindən Halo Trust, GICHD, APOPO "Mina Məsləhət Qrupu" (MAG) kimi mina proqramlarında aktiv iştirak edən beynəlxalq qurumlara müraciət edərək, onları Ermənistan tərəfindən minalı xəritələrin Azərbaycana təhvil verilməsinə dair petisiyaya qoşulmağa çağırıb.
Müraciətdə bildirilir ki, azərbaycanlı məcburi köçkün ailələri 30 il öncə zorla tərk etdikləri evlərinə qayıtdıqdan sonra bu minalar səbəbindən həyatlarını təhlükə altında qoyurlar. Uşaqların üzərində gəzdiyi bu torpaq indi onların həyatlarını almaq potensialına malikdir. Bu xəritələrin təhvil verilməsini tələb etmək üçün daha çox şey edilə bilər. Dünya vətəndaşları olaraq, bu minaların yerinin təsbit edilməsi üçün bizim də üzərimizə öhdəlik düşür. İşğaldan azad edilmiş ərazilərdə mina yerlərinin təsbit edilməsi həm Azərbaycan, həm də Ermənistan üçün dinc gələcəyə irəliləmək yolunda növbəti vacib addımdır. Keçmişin səhvlərini düzəldərək gələcəyə baxmağa davam etməliyik. Müraciətə tanınmış ictimai xadimlər Çingiz Abdullayev və Azər Qəribov qoşulublar.