UNICEF-in Azərbaycan üzrə Nümayəndəliyinin rəhbəri Edvard Karvardinin ölkəmizdəki 5 illik fəaliyyət müddəti başa çatır. Edvard Karvardin, bu münasibətlə Beynəlxalq Avrasiya Mətbuat Fondunun prezidenti Umud Mirzəyevə məktub ünvanlayıb. Məktubda o, UNİCEF və BAMF arasında qurulan mükəmməl əməkdaşlığa görə minnətdarlığını ifadə edib.
Qeyd edək ki, İngiltərə vətəndaşı olan Cənab Karvardin, karyerasına 1997-ci ildə, UNICEF-in icma əsaslı ianə və ictimai əlaqələr fonduna kommunikasiya mütəxəssisi kimi üzv olandan sonra başlayıb. Əvvəllər İngiltərənin şimal-qərbindəki həssas icmalara dəstək verən, sosial yardım təşkilatında İanə və İctimaiyyətlə Əlaqələr Fondunun rəhbəri olub. Cənab Edvard İngiltərənin UNICEF Milli Komitəsində çalışdığı müddətdə UNICEF ilə Hindistan və Madaqaskarda humanitar yardım missiyaları da yerinə yetirib. Cənab Karvardin BMT-nin Uşaq Fondunun (UNICEF) Azərbaycan Respublikasındakı Nümayəndəsi vəzifəsinə 2016-cı ilin oktyabr ayında təyin edilib. Bundan əvvəl o, Nyu-York şəhərində UNİCEF-in Kommunikasiya üzrə direktor müavini kimi çalışıb. Daha əvvəl isə cənab Karvardin 2009-cu ildə UNİCEF-in İndoneziyadakı Nümayəndəliyində və 2004-cü ildə isə UNİCEF-in Kabildəki Nümayəndəliyində Kommunikasiya rəhbəri kimi fəaliyyət göstərib. O, 2002-ci ildə BMT-nin Baş Assambleyasının qlobal “Humanitar fəaliyyət hesabatı”nın hazırlanmasında Assambleyanın Uşaqlar üzrə Xüsusi Sessiyasına dəstək göstərib. Liverpul Universitetindən İngilis dili və ədəbiyyatı üzrə bakalavr dərəcəsinə malikdir.
Eurasia Diary məktubun mətnini təqdim edir:
Hörmətli cənab Mirzəyev,
Birləşmiş Millətlər Təşkilatının Uşaq Fondunun (UNICEF) Azərbaycan Respublikasındakı Nümayəndəsi kimi beş illik fəaliyyət müddətimin ardınca, tezliklə qurum daxilində yeni vəzifəmin icrasına başlayacağam. Bu səbəbdən, fürsətdən istifadə edərək, Azərbaycanda fəaliyyət göstərmək şərəfinə nail olduğum müddət ərzində qurumlarımız arasındakı mükəmməl əməkdaşlığa görə sizə təşəkkürümü bildirirəm.
Ölkədəki uşaqların və gənclərin həyatlarına və gələcəyinə kiçik də olsa, müəyyən formada töhfə verməkdən böyük qürur hissi duyuram. Bilirəm ki, bu müddətdə edə biləcəyim daha çox şey vardı və arzu etdiyim qədər güclü səy göstərə bilmədiyim məsələlər də olmuşdur. Bununla belə, ötən bir neçə il ərzində birgə səylərimiz nəticəsində çoxsaylı uşaqlar üçün irəliləyişə nail olduğumuza ümid edirəm.
Əminəm ki, Azərbaycanın hər yerində yaşayan uşaqlar və gənclər zəngin imkanlarla dolu parlaq gələcəyə sahib olacaq. Burada keçirdiyim zamanı öz xatirələrimdə əziz tutacaq, əməkdaşlığımız vasitəsilə nail olduqlarımızdan hər zaman qürur duyacağam.
Vəzifəmin icrası rəsmi olaraq gələn həftə başa çatsa da, 2016-cı ildən etibarən evim olan bu ölkədəki son anlarımdan həzz almaq üçün iyul ayının sonunadək Azərbaycanda qalacağam və xələfimin öz vəzifəsinin icrasına avqust ayının əvvəlində başlaması gözlənilir.
Fəaliyyət müddətim ərzində göstərdiyiniz dəstəyə və mehribanlığa görə sizə bir daha təşəkkür edir, sizə və həmkarlarınıza ən xoş arzularımı çatdırıram.
Hörmətlə
Edvard Karvardin