Bu gün Əl-Cəzirə televiziyasının Bakıda olan əməkdaşları Beynəlxalq Avrasiya Mətbuat Fondunu ziyarət ediblər. Telekanalın əməkdaşları - Müntəzir Mərayi, Rene Odeh, Abdussəttar Kamil və İsam Ayyad BAMF-ın prezidenti Umud Mirzəyevlə görüşüblər. Görüş zamanı qonaqlar BMT ECOSOC-un əsas məşvərətçi statuslu tərəfdaşı olan BAMF-ın, eləcə də onun nəzdində dörd dildə yayımlanan Eurasia Diary Beynəlxalq Analitik İnformasiya Portalının fəaliyyəti yaxından tanış olublar.
Görüş zamanı BAMF prezidenti Umud Mirzəyev 44 günlük Vətən müharibəsi zamanı qazanılan qələbə, Qarabağın işğaldan azad edilməsi, Beynəlxalq Avrasiya Mətbuat Fondunun beynəlxalq təşkilat olaraq bu xüsusda həyata keçirdiyi bəzi layihələr haqda söz açıb. O, bildirib ki, BAMF beynəlxalq bir təşkilat olaraq Azərbaycan, eləcə də MDB məkanında baş verən konfliktlər haqda BMT-nin yüksək səviyyəli tədbirlərində bir çox çıxışlar edib.
“Bizim əsas missiyamız insan haqları, söz azadlığı və konfliktlərin həlli məsələləri ilə bağlıdır. Azərbaycan postsovet məkanıdır və burada sovetlər zamanı informasiya mübadiləsi qeyri-mümkün idi. BAMF 1992-ci ildə təsis olunandan bəri bu sahədə ciddi təşəbbüslər göstərərək Azərbaycanın Qarabağ problemi ilə bağlı haqq səsini dünyaya çatdırmağa çalışıb”.
Umud Mirzəyev həmçinin Əl-Cəzirə ilə son on il ərzində əməkdaşlıq barədə söz açıb. O, tanınmış telekanalın Qarabağ hadisələri ilə bağlı gerçəkləri ekranlarda daim nümayiş etdirməsi, bu və digər sahələrdə misilsiz xidmətlərinin təqdirəlayiq olduğunu bildirib.
“Əl-Cəzirə ilə 10 ildən artıqdır birgə əməkdaşlıq edirik. Telekanalın bir çox əməkdaşları BAMF-ın qonağı olub. Biz hələ işğal dönəmində onlarla birgə Qarabağ bölgəsində səfərlərdə olmuşuq. Təşkilatımız onların bölgəyə səfər etməsində yaxından dəstək olub”, deyə BAMF prezidenti bildirib.
Qeyd edək ki, telekanalın əməkdaşları ADA Universiteti və Əl-Cəzirə Media İnstitutunun birgə təşkilatçılığı ilə Əl-Cəzirə Media İnstitutunun Media Məsələləri üzrə meneceri Müntəzir Mərayinin rəhbərliyi altında Bakıda yerli jurnalistlər üçün təlimlər keçib. Onlar bundan sonra Qarabağ bölgəsinə səfər edəcək, erməni faşizminin işğaldan azad edilmiş ərazilərdə törətdikləri vəhşilikləri gözləri ilə görəcəklər.