Anasının qisasını ermənilərdən alan polkovnik - Kəlbəcər yataqlarını ilk dəfə o çəkmişdi | Eurasia Diary - ednews.net

28 Sentyabr, Çərşənbə axşamı

Anasının qisasını ermənilərdən alan polkovnik - Kəlbəcər yataqlarını ilk dəfə o çəkmişdi

Cəmiyyət A- A A+

Ağdam şəhərində doğulmuşdu, doğma şəhəri işğal edilən zaman anası şəhid oldu, o isə bu zaman Ağdam yaxınlığında, Əsgəran rayonunun Naxçıvanik kəndi uğrunda gedən döyüşlərdə iştirak edirdi. Gecikmişdi, nə anasını, nə doğma şəhərini xilas edə bilməmişdi. Bəs daha nə üçün yaşayır, nə üçün döyüşürdü?! Bu barədə çox düşündü və sonda onu bundan sonra yaşadan sadəcə iki amalın qaldığını anladı: Vətən və Qisas. Onu dünyaya gətirən anasını itirmişdi, mənəvi anası olan Vətəni isə işğalla üz-üzə qalmışdı. Bu gündən sonra o sadəcə qisası düşünür, vətən torpağının azad edilməsi yolunda canı bahasına xidmət etməyi arzulayırdı. Tanrı ona həm anasının qisasını almağı, həm də tək amalı və sevgisi olan Vətəni uğrunda şəhid olmağı nəsib etdi, o, “Murov Qartalı”, polkovnik Raquf Orucov idi...

İyulun 12-də Aprel döyüşlərində xüsusi şücaəti ilə fərqlənən və şəhidlik zirvəsinə ucalan məşhur kəşfiyyatçı Raquf Orucovun doğum günüdür. O, 1972-ci il 12 iyulunda Ağdam rayonunun Cinli kəndində anadan olub. Yaşasaydı 49 yaşı tamam olacaqdı... Olmadı, onun taleyinə doğulub boya-başa çatdığı Ağdamı azad görmək yazılmamışdı...

“Murov Qartalı” ləqəbli məşhur kəşfiyyatçının tərcümeyi-halı çoxlarına sirr olmasa da haqqında bir neçə kiçik məlumatı qeyd edək:

1990-cı ildə Sovet Qoşunlarında xidmət edən Raquf Orucov bir müddət sonra ordudan ayrılıb və çətin günlərdə Azərbaycan Ordusunun sıralarına qoşulub. Raquf Orucov Fərrux dağı və Aranzəmin kəndində aparılan hərbi əməliyyatlar zamanı ayağından ağır qəlpə yarası alıb.

1993-cü ilin 12 iyununda rus-erməni ordusu Qarabağın əksər yaşayış məntəqələri kimi Ağdam rayonunun Cinli kəndini işğal etdi. İşğal nəticəsində Raquf Orucovun anası Raya xanım namərd düşmən gülləsindən şəhid oldu.

Ali Hərbi Məktəbi bitirən Raquf Orucov Bakı şəhərində yerləşən hərbi hissələrin birinə təyinat alsa da, gənc zabit ön cəbhədə xidmətə üstünlük verib. 1996-cı ildə təyinatını düşmənlə üz-üzə dayanan Murovdağda alaraq, kəşfiyyat bölüyünün komandiri kimi fəaliyyətini davam etdirib.

Polkovnik-leytenant Raquf Orucovun sonuncu döyüşü 2016-cı il aprel ayının əvvəlində olub. Düşmənlə qəhrəmancasına vuruşan Raquf Orucov şəhid olub. 2016-cı il aprelin 5-i polkovnik-leytenant Raquf Orucov son mənzilə yola salınıb. Sumqayıt şəhərində keçirilən dəfn mərasimində minlərlə insan iştirak edib. O, Sumqayıtın Şəhidlər Xiyabanında dəfn olunub.

R. Orucova “Murov Qartalı” ləqəbini qazandıran Murov silsilələrində çox çətin relyefdə uğurla həyata keçirdiyi əməliyyatlar olub. Bu əməliyyatlardan bəlkə də ən vacibi əsir düşmüş 7 əsgərimizin geri qaytarılması idi. 1995-ci ilin oktyabrında Murovda xidmət edən 7 hərbi qulluqçumuz kəskin duman nəticəsində yolunu azmış və düşmənə əsir düşmüşdülər. Müdafiə Nazirliyi hadisədən xəbər tutan kimi ordumuzun əlində olan erməni əsirlərlə əsgərlərimizi dəyişmək barədə göstəriş verdi, lakin o zaman ordunun əlində erməni əsir yox idi. Beləliklə, kəşfiyyat taboruna hədəf görünmüşdü, erməni tərəfindən bir neçə nəfər əsir götürülməli və onlarla girov götürülən əsgərlərimiz dəyişdirilməli idi. Bu əməliyyat R. Orucova tapşırıldı. O zamanlar hələ kiçik leytenant rütbəsində olan Orucov 6 nəfərlik kiçik kəşfiyyat qrupu yaradaraq Murov dağından keçib Kəlbəcər istiqamətinə yollanır. Qeyd edək ki, Murov dağı kimi çətin relyefi və sərt təbiəti olan bir yerdə düşməndən əsir götürmək və onları canlı şəkildə təyin edilmiş yerə gətirmək olduqca mürəkkəb, bəlkə də, mümkün olmayan tapşırıq idi. Kiçik leytenant Orucov üçün isə bu bir qisas məsələsi idi. O, müharibədə anasını xilas edə bilməmişdi, lakin bu gün öz kiçik qardaşları hesab etdiyi əsgərləri xilas etmək onun üçün anasını azad etmək qədər önəmli idi.

Orucov könüllü şəkildə bu tapşırığı qəbul etmiş və əməliyyata yollanmışdı. Bu onun öz taleyindən aldığı qisas olacaqdı... Nəhayət, onun komandanlığı altında 6 nəfərlik kəşfiyyat qrupu Murov silsiləsini keçib Kəlbəcərdəki qızıl mədənlərinə çatdılar. Qeyd edək ki, bu gün ordumuzun nəzarəti altında olan Kəlbəcərdəki Zod qızıl yatağının işğaldan sonra ilk foto şəkilləri bu əməliyyatda R. Orucov tərəfindən çəkilmişdi. Orucovun kəşfiyyat qrupu bir qədər də irəli getdikdən sonra aşağıdakı yamacda ermənilər öz işləri ilə məşğul idilər. Kəşfiyyatçılarımız bir qədər gözləyirlər, axşam qaranlıq düşənə yaxın ermənilərin əksəriyyəti ərazini tərk etsələr də, 3 kişi hələ də orada idi. Bu zaman Raquf Orucov bir qədər də ermənilərə yaxınlaşaraq “Zil” markalı avtomaşının arxasına keçərək əli ilə kabinədə tək oturmuş erməninin ağzını qapayır. Dərhal kəşfiyyat qrupunun üzvlərinə “İrəli!” işarəsini verir, hərbçilərimizin gözlənilməz gəlişindən qorxuya düşən digər iki erməniyə isə “səsinizi çıxarsanız gülələyəcəyik” deyir. Vəziyyətin nə yerdə olduğunu anlayan ermənilər heç bir müqavimət göstərmədən təslim olurlar. Raquf Orucovun başçılıq etdiyi Azərbaycan kəşfiyyat qrupunun üzvləri dərhal 3 ermənini də özləri ilə götürərək geriyə - Azərbaycan Ordusunun nəzarətində olan əraziyə doğru qayıdırlar.

Komandanlığın əmri əsasında verilmiş əməliyyat tapşırığını uğurlu yerinə yetirərək girov götürdükləri 3 ermənini də xidmət etdikləri briqadaya gətirən Raquf Orucov və onun kəşfiyyatçı əsgərləri burada əsl qəhrəman kimi qarşılanır. Çünki bu, həqiqətən də Qarabağ müharibəsində uğurla həyata keçirilən ən nadir əməliyyatlardan biri hesab olunurdu. Məhz bu uğurlu əməliyyat nəticəsində düşmənə əsir düşmüş 7 Azərbaycan əsgəri tezliklə və çox asanlıqla azad edildi. Həmçinin Raquf Orucovun çox çətin və son dərəcə riskli olan bu əməliyyatın öhdəsindən uğurla gəlməsi Azərbaycan Silahlı Qüvvələrinə düşmənin gücü və mövqeləri barədə daha dəqiq, zəngin və xüsusi hərbi əhəmiyyətli məlumatlar qazandırmışdı.

“Murov Qaratlı” Raquf Orucov bu və bunun kimi onlarla kəşfiyyat əməliyyatlarını uğurla həyata keçirmiş, düşmənin yüzlərlə canlı hədəfini, texnikasını sıradan çıxarmış və 4 günlük Aprel müharibəsində də misilsiz şücaət göstərərək şəhidlik zirvəsinə ucalmışdı. Həm şəhid övladı, həm də şəhid kimi millətimizin qəlbində xüsusi yeri olan Raquf Orucovu dərin hörmət və ehtiramla anırıq.

Vətən sağ olsun.

Vətən dediyimiz Raquf kimi aslan oğullar və onları dünyaya gətirən Raya xanım kimi aslan ürəkli analar deyilmi?!

Nicat İsmayılov

Eurasia Diary

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...