“Trend” İnformasiya Agentliyinin Mətbuat Mərkəzində azərbaycanlı alim, hüquq elmləri doktoru, Beynəlxalq Elmlər Akademiyasının (Avstriya) həqiqi üzvü Kamal Makili-Əliyev Dədə Qorqud Beynəlxalq Fondu və "Azərbaycan dünyası" jurnalının təsis etdiyi "Vətən övladı" ordeni ilə mükafatlandırılması mərasimi keçirilib.
EDNews.net xəbər verir ki, mükafatı azərbaycanlı alimə "Dədə Qorqud" Fondunun prezidenti, "Azərbaycan dünyası" jurnalının baş redaktoru Eldar İsmayılov təqdim edib.
Eldar İsmayılov Fondun və rəhbərlik etdiyi jurnalın uzun illərdir ki, diasporla sıx əməkdaşlıq etdiyini, xaricdə yaşayan azərbaycanlı gənclərə fəal dəstək verildiyini vurğulayıb.
O qeyd edib ki, Azərbaycan gəncləri vətəninə faydalı, Azərbaycan dövlətinin mövqeyini fəal şəkildə dəstəkləyən istedadlı insanlardır. Onlardan biri də Raoul Wallenberg İnsan Hüquqları və Humanitar Hüquq İnstitutunun (Lund, İsveç) elmi işçisi, Malmö Universitetinin (İsveç) Beynəlxalq Hüquq və İnsan Haqları üzrə baş müəllimi Kamal Makili-Əliyevdir.
"Kamal Makili-Əliyev 30 yaşında doktorluq dissertasiyasını müdafiə edib, beynəlxalq hüquq və Ermənistan-Azərbaycan münaqişəsi mövzusunda xaricdə ingilis dilində nəşr olunan monoqrafiyaların müəllifidir. Bunlardan biri Londonda yüksək kateqoriyalı Routledge nəşriyyatı tərəfindən nəşr edilib”, deyə Eldar İsmayılov bildirib.
Kamal Makili-Əliyev elmi fəaliyyətinə verilən yüksək qiymətə və "Vətən övladı" ordeni ilə təltif olunmasına görə minnətdarlığını bildirərək bunun sonrakı işlərə təkan verdiyini söyləyib.
O vurğulayıb ki, "Mübahisəli ərazilər və beynəlxalq hüquq. Dağlıq Qarabağ münaqişəsi və Aland adaları presedentinin müqayisəli tədqiqi" adlı son monoqrafiya əsəri 2020-ci ildə nəşr edilib. Alim monoqrafiyanın 44 günlük müharibə başlamazdan əvvəl çap olunduğunu qeyd edib.
Tədbirdə çıxış edən tanınmış azərbaycanlı politoloq Tofiq Abbasov və Televiziya və Radio Akademiyasının rektoru, fəlsəfə doktoru Faiq Hüsiyev Kamal Makili-Əliyevin fəaliyyətini yüksək qiymətləndiriblər. Kamal Makili-Əliyevin çox vacib işlər gördüyü qeyd edilib. Alimin apardığı tədqiqat işləri, nəşr olunan monoqrafiyalar Qarabağ həqiqətlərinin dünya ictimaiyyətinə çatdırılması baxımından böyük əhəmiyyətə malikdir.
Tədbir zamanı müəllifin monoqrafiyaları iştirakçıların diqqətinə çatdırılıb.
Qeyd edək ki, "Mübahisəli ərazilər və beynəlxalq hüquq. Dağlıq Qarabağ münaqişəsi və Aland adalarının presedentinin müqayisəli tədqiqi" monoqrafiyası dünyanın ən yüksək "A" kateqoriyalı elmi nəşriyyatı-Routledge (Böyük Britaniya). Nəşriyyatında nəşr edilib. Kitabdakı araşdırmalar dünyanın elmi nəşrlərində tətbiq olunan ciddi sınaqlardan keçib.