Azərbaycan Respublikasının Medianın İnkişaf Agentliyi, ADA Universiteti, Beynəlxalq Münasibətlərin Təhlili Mərkəzi və Beynəlxalq Avrasiya Mətbuat Fondunun birgə təşkilatçılığı ilə Əl-Cəzirə Media Şəbəkəsinin Azərbaycan media nümayəndələri üçün "Jurnalistlərin münaqişə zonasında davranışları: Təhlükəsizlik və mühafizə qaydaları" mövzusunda beş gün davam edən təlimlər başa çatıb.
EDNews.net-in məlumatına görə, ADA Universitetində bu gün təşkil olunan təltifetmə mərasimində Beynəlxalq Avrasiya Mətbuat Fondunun (BAMF) prezidenti Umud Mirzəyev çıxış edərək hamını salamlayıb. O, Media İnkişaf Agentliyinin rəhbəri Əhməd İsmayılova təlim proqramının həyata keçirilməsində bilavasitə dəstək göstərdiyi üçün təşəkkürünü bildirib, Prezident Administrasiyasının Xarici siyasət məsələləri şöbəsinin müdiri Hikmət Hacıyevə dərin minnətdarlığını ifadə edib. U. Mirzəyev həmçinin Əl-Cəzirə Media Şəbəkəsinin İctimai Azadlıqlar və İnsan Hüquqları Mərkəzinin direktoru Sami Əl-Hacc və beynəlxalq təlimçi David Risə təşəkkür edib. “Hesab edirəm ki, bura çox gərgin bir proqramı başa vurduq. Bu gün istər sosial şəbəkədə, istərsə də müxtəlif media qurumlarında bu təlimlərdən danışılır. Sözügedən təlimlər Əl-Cəzirə ilə uzun illərdir davam edən əməkdaşlığın bəhrəsidir. Əl-Cəzirə çox böyük media şəbəkəsidir və hər zaman demişəm ki, onun böyüklüyü neytrallığıdır”.
ADA Universitetinin icraçı prorektoru Fariz İsmayılzadə də öz növbəsində çıxış edərək tədbir iştirakçılarına universitetin rektoru Hafiz Paşayevin salamlarını çatdırıb. O bildirib ki, beş gün davam edən təlimlərdə faydalı məlumatlar, bacarıq və biliklər qazanılıb: “Bu gün ADA Universiteti inkişaf proqramlarına çox böyük önəm verir. Biz artıq Media Agentliyi ilə bir neçə təlim təşkil etmişik. BAMF prezidenti Umud Mirzəyev növbəti təlim ideyası haqda danışarkən biz bunu alqışladıq. Ümid edirəm ki, xarici mütəxəssislərlə ünsiyyət faydalı oldu. Azərbaycanda media və jurnalistika sahəsi inkişaf edəcək. Biz də bu ildən başlayaraq, yeni Media kommunikasiya ixtisası açmışıq, orada bakalavr tələbələri yetişəcək və gələcəkdə sizin sıralarınıza qatılacaqlar. Biz sizə uğurlar diləyirik. Gələcəkdə də sizi ADA Universitetində gözləyirik və sizin peşəkar inkişafınızda dəstək olmağa həmişə hazırıq”.
Media İnkişaf Agentliyinin rəhbəri Əhməd İsmayılov isə öz çıxışında ADA və Əl-Cəzirə ilə əməkdaşlığın davamlı olacağını bildirib: “ADA Universiteti və Əl Cəzirə Media Şəbəkəsi vasitəsilə böyük bir platformaya çıxmaq mümkündür. ADA Universiteti ilə imzaladığımız yeni memorandum da buna imkan verəcəkdir”.
Daha sonra Beynəlxalq Münasibətlərin təhlili Mərkəzinin şöbə müdiri Cavid Vəliyev çıxış edərək təlimlərin əhəmiyyətindən söz açıb və təşkilatçılara minnətdarlığını ifadə edib.
Mətbuat Şurasının sədri Əflatun Amaşov da çıxış edərək təlimdə iştirak edən jurnalistləri təbrik edib. O qeyd edib ki, bütün dünyada jurnalistika dəyişir və buna görə də artıq Azərbaycanda jurnalistikanın nəzəri əsasları dəyişir. Bu tipli təlimlər Azərbaycan jurnalistlərinin müasir texnikalara yiyənlənməsinə şərait yaradır.
Əl-Cəzirə Media Şəbəkəsinin İctimai Azadlıqlar və İnsan Hüquqları Mərkəzinin direktoru Sami Əl-Hacc ADA Universitetinə, BAMF-a və bütün təşkilatçılara minnətdarlığını bildirib: “Siz olmasaydınız belə bir təlim keçirilə bilməzdi. Bu qızıl qaydanı xatırlayaq: Jurnalistin həyatı xəbərdən önəmlidir. Burada bir ağsaqqalımız var. Özü bizə çox xahiş edib və deyib ki, gəlin burada bir təlim keçək. Umud Mirzəyev olmasaydı bu təlim olmazdı. Biz sizə söz veririk ki, bundan sonra başqa təlimlər də olacaq. Sizi də Əl-Cəzirədə gözləyirik”.
Çıxışının sonunda Sami Əl Hacc BAMF Prezidenti Umud Mirzəyevə jurnalist dəbilqəli suvenir həddiyyə edib.
Sonda ADA Universitetində bu gün təşkil olunan təltifetmə mərasimində təlim proqramını müvəffəqiyyətlə başa vuran iştirakçılara sertifikatlar təqdim olunub.
Qeyd edək ki, Beynəlxalq Avrasiya Mətbuat Fondunun dəvəti ilə uzun illər əməkdaşlıq etdiyi Əl-Cəzirə Media Şəbəkəsinin nümayəndə heyəti beş gündür Bakıdadır. Nümayəndə heyətinə Əl-Cəzirə Media Şəbəkəsinin İctimai Azadlıqlar və İnsan Hüquqları Mərkəzinin direktoru Sami Əl Hacc rəhbərlik edir. Səfər çərçivəsində Əl-Cəzirə Media Şəbəkəsi tərəfindən bir qrup Azərbaycan media mənsublarına Konflikt Jurnalistikası ilə bağlı təlimlər keçmək, işgaldan azad olunmuş rayonlara səfər etmək, eləcə də ölkəmiz haqqında müxtəlif mövzularda reportajların hazırlanması nəzərdə tutulur.
