Bakıda əhalinin sayı durmadan artdığı bir zamanda insanların taksi nəqliyyatına tələbatı da sürətlə artır. Koronavirusun tüğyan etdiyi, ictimai nəqliyyatın uzun müddət işləmədiyi bir dövrdə isə taksilərə tələbat birə beş artıb.
Tıxaclardan boğaza yığıldığımız, əsəblərimizin korlandığı şəhərdə normal taksi şirkəti tapmaq da çətindir. Paytaxtda fəaliyyət göstərən şirkətlər daha çox müştəri yığmaq, şirkət sürücüləri isə daha çox insanı mənzil başına çatdırıb pul qazanmaq üçün yarışa giriblər. Yarış isə heç də ürəkaçan nəticələrə gətirib çıxarmır.
Redaksiyamıza zəng edən Nigar Abdullayeva adlı vətəndaşın sözlərinə görə, oktyabrın 18-də axşam saat 17:00 radələrində “Bolt” şirkətindən taksi sifariş verib. İnsaf naminə, avtomobil dərhal sifariş ünvanına çatıb. Bu mənada “Bolt” şirkəti kifayət qədər operativ çalışır.
Hərəkətdə olarkən, Nigar xanım sürücüdən “Tələsirəm, zəhmət olmasa, məni ünvana tez çatdırın” deyə xahiş edib. Sürücü isə bunu “yaşıl” işıq sanaraq, irəli şütüyüb. Və bu zaman yol hərəkətini tənzimləyən işıqforun işıqlarını da unudub. Odur ki, 5 dəqiqə sonra işıqforun sarı işığında keçən zaman yol patrul xidmətinin əməkdaşı tərəfindən saxlanılıb. Polis sürücünün sarı işıqda keçdiyini bildirərək, sənədləri tələb edib. Məlum olub ki, taksi sürücüsü sarı işıqdan keçməkdən savayı, üstündə avtomobili idarə etmək üçün sənədi də yoxdur. İdarə etdiyi avtomobil isə öz şəxsi maşını deyil, “Bolt” şirkətinə məxsusdur. Və beləliklə, avtomobil cərimə meydançasına aparılıb. Ünvana tələsən Nigar xanım isə məcburən başqa şirkətə üz tutub.
Amma olay bununla başa çatmayıb. Bir gün sonra Nigar xanıma Fransa ölkə kodu ilə telefon zəngi (+33 75 791 91 xx) gəlib. Özünü “Bolt” şirkətinin əməkdaşı kimi təqdim edən şəxs təmiz Azərbaycan dilində baş verən hadisəyə Nigar xanımla aydınlıq gətirməyə çalışıb. Nigar xanımın sözlərinə görə, söhbət zamanı belə qənaətə gəlib ki, taksi sürücüsü “Bolt” şirkətinə məxsus avtomobili idarə etsə də, həmin sürücüyə etibarnamə verilməyib.
İndi ortaya belə sual çıxır: Məsuliyyətsizliyə və qayda pozuntusuna kim cavabdehdir? Axı sürücülük sənədi olmayan şəxs niyə avtomobil idarə edir? Və eyni zamanda, “Bolt” şirkəti sürücüyə niyə etibarnamə verməyib?
Daha bir sual: Azərbaycanda baş verən hadisə ilə bağlı Fransa ölkə kodu olan nömrədən niyə zəng edib sual verirlər? Bunu Azərbaycana məxsus nömrə ilə etmək mümkün deyil? Bəlkə vətəndaş hansısa sualla və ya gələn zəngin səhihliyi ilə bağlı təkrar zəng etmək istədi? O niyə Fransaya zəng etməlidir ki?
Həyatımızı kimə etibar etdiyimizi də bilmirik.