Ata Abdullayev hönkür-hönkür ağladı - ednews.net

3 Dekabr, Cümə

Ata Abdullayev hönkür-hönkür ağladı

Cəmiyyət A- A A+

Hədə-qorxu ilə pul tələb etməkdə ittiham olunan qalmaqallı bloqer Ata Abdullayevin cinayət işi üzrə Bakı Ağır Cinayətlər Məhkəməsində məhkəmə prosesi keçirilib.

EDNews.net-in virtualaz.org-a istinadən verdiyi xəbərə görə, A.Abdullayev yenə də özünə xas üslubda çıxış edib,  daha sonra günahının nədən ibarət olmasını və həbsinin səbəbini bildiyini deyib. Hərçənd bu “əsl səbəbin” nədən ibarət olduğu haqda danışmayıb. O, məhkəmədə göz yaşları axıdıb və hakimə “ata” deyib: “Cənab hakim, atam yoxdur, bir ata kimi sizdən xahiş edirəm, məni buraxın...”

Daha sonra dövlət ittihamçısı ittiham aktını elan edib. İttihama görə, A.Abdullayev müxtəlif şəxslərdən onların barəsində  rüsvayedici məlumatlar yaymaq hədəsi ilə pul tələb edib. İttihama əsasən, Gənclər və İdman Nazirliyinin təşkil etdiyi Avropa Oyunları və Formula-1 yarışlarıyla bağlı Əməliyyat Komitəsində çalışan Elmar Əliyevə zəng vuraraq ondan 10 min manat istəyib. Nəticədə  ondan 2400 manatlıq iPhone 11 Pro Max telefonu alıb.

Abşeron rayon İcra Hakimiyyətinin Masazır qəsəbəsi üzrə nümayəndəsi Şahlar Həsənovdan isə 6000 pul istəyib. O, Masazırda məişət tullantılarının vaxtında daşınmamasıyla bağlı video yaymaqla hədələyib. Aşmış ağacı videoya çəkərək, sahibkar Cəmil Babayevi ağacları kəsməkdə ittiham etməklə ondan da pul tələb edib. Sabunçuda sahibkar Elçin Əliyevi qanunsuz tikinti aparmaqda ittiham edərək, ondan 15000 manat pul tələb edib.

A.Abdullayev ona elan olunmuş ittihamla razılaşmayıb və məhkəmə zalında iştirak etmək istəmədiyini deyib: “Məni buradan çıxarın. Haqqımı sizə halal edirəm. Nə qədər istəyirsiz, hökm oxuyun. Canım sizə fəda olsun”

Zərərçəkmiş Elmar Əliyev məhkəməyə ifadəsində deyib ki, Ata Abdullayevlə bir neçə dəfə telefon danışıqları olub: “Həyatda görməmişdim, sosial şəbəkələrdən tanıyırdım. Telefonda mənimlə aqressiv danışırdı. Nə dediyini anlamaq olmurdu. Mənim biznes şərikim vardı, onunla aramızda problemimiz oldu. Bundan sonra Ata Abdullayev mənə zəng vurub dedi ki, sən məmursan, dövlətin malını yeyirsən, talayırsan. Guya mən Avropa Oyunlarından sonra Olimpiya kəndində evlərdən mebelləri və başqa əşyaları mənimsəmişəm, satmışam. Bunlar hamısı yalandır. Fikirləşdim ki, ictimaiyyət arasında tanınan adam deyiləm, məmur da deyiləm, niyə mənə zəng eləsin? Mən müqavilə işləyən mühasib olmuşam. İngilis dilini bildiyimə görə dəvət ediblər, xarici mütəxəssislərlə işləmişəm. Sonradan başa düşdüm ki, şərikim Turalın sifarişidir. Özü də növbəti zəngdə mənə dedi ki, sən Turalı döymüsən və s. O zaman lap əmin oldum. Pulu vermədim, canlı yayım açıb, mənim haqqımda danışdı. Özüm baxmamışdım, amma zəng eləyib mənə xəbər verdilər. Əvvəl 10 min demişdi, sonra iPhone istədi. Dostumdan xahiş elədim, 2400 manata aldı, apardı Ata Abdullayevin göndərdiyi adama verdi. Dostum telefonu alanda kodunu çəkib saxlamışdı. Bundan sonra Ata Abdullayev məndən əl çəkdi, canlı yayımı da sildi”.

Zərərçəkmiş bildirib ki, hüquqi məsələlərin həlli üçün mərhum vəkil Adil İsmayılovla müqavilə bağlayıb. Mərhum vəkilin bununla bağlı A.Abdullayevlə telefon danışığı olub: “Ata Abdullayev məni elə təqdim edirdi, elə bil nazirəm, ya da nazir müaviniyəm. Hamı bilir ki, bu adam pulla sifarişlər yerinə yetirir”.

A.Abdullayev zərərçəkmişin yalan danışdığını, onun haqqında heç bir video yaymadığını, onu şantaj etmədiyini, E.Əliyevdən telefon aldığını təsdiqləyən heç bir sübut olmadığını deyib.

Zərərçəkmiş isə sonda A.Abdullayevə verdiyi mobil telefonun qaytarılmasını tələb edib.

Məhkəmə prosesi oktyabrın 26-da davam edəcək.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...