“27 sentyabr yeni tarixin başlanğıcı oldu. Rəşadətli Azərbaycan ordusu Ali Baş Komandan İlham Əliyevin rəhbərliyi altında 30 il işğal altında olan ərazilərimizi 44 günə azad etdi”.
EDNews.net xəbər verir ki, bunu Beynəlxalq Avrasiya Mətbuat Fondunun təşkilatçılığı ilə misirli alim, tədqiqatçı və jurnalist Əhməd Abdo Tərabikin “Dəmir yumruq-Qarabağ müharibəsi 2020-ci il” adlı kitabının təqdimat mərasimində Bakı Dövlət Universitetinin rektoru Elçin Babayev bildirib.
BDU rektoru bildirib ki, Prezident İlham Əliyevin adı torpaqları azad edən sərkərdə kimi dünya tarixinə yazılıb: “Müharibədə ikinci cəbhə informasiya cəbhəsi idi. Prezidentin gətirdiyi arqumentlər, çıxışlar, onun haqlı mövqeyi bu qələbədə misilsiz rol oynadı”.
Elçin Babayev qeyd edib ki, Azərbaycan haqqı olanı geri qaytardı. Amma düşmən yenə təxribatlara əl atır. Buna baxmayaraq, onun təxribatlarının qarşısı qətiyyətlə alınacaq: “Biz Prezidentin ətrafında dəmir yumruq kimi birləşmişik. BDU-nun da yüzlərlə məzun və tələbəsi döyüşə atılıb. Onlardan 9 nəfəri şəhidlik zirvəsinə ucalıb”.
BDU rektoru bildirib ki, başçılıq etdiyi universitet də informasiya savaşında bacardığını ortaya qoyub: “BDU məlumatların yayılması və monitorinq prosesində yaxından iştirak edib. Biz iki layihə həyata keçirdik. Birincisi məcburi köçkünlərin pozulmuş hüquqlarına dair kompleks hesabat idi. İkincisi isə yerli və xarici medianın fəaliyyətinin təhlili ilə bağlı oldu”.
Gülnar Səlimova
