Sosial şəbəkələrdə taksi sürücüsünün Azərbaycan bayrağı ilə avtomobilini təmizləməsi cəmiyyətdə hiddət doğurub. Dövlət atributunu təhqir edən bu şəxs ictimaiyyət arasında qınaq obyektinə çevrilib.
Bayraq dövlətin simasıdır. Bu simanı qoruya bilmiriksə, bu özü ciddi bir nöqsandır. Bəs, dövlət atributunu təhqir edən şəxsi hüquqi olaraq hansı cəza gözləyə bilər?
Tanınmış hüquqşünas Əsabəli Mustafayev saytımıza açıqlamasında qeyd edib ki, dövlət bayrağının təhqir olunması cinayət məsuliyyəti yaradır.
"Dövlət bayrağının istifadəsi qaydaları haqqında qanuna əsasən, dövlət bayrağının təhqir olunmasına görə bir ilə qədər azadlıqdan məhrum etmə cəzası verilir. Dövlətçiliyə qarşı olan bu hərəkət mütləq şəkildə cəzalandırılmalıdır".
Vəkilin sözlərinə görə, həmin şəxsin verdiyi izahat da məntiqsizdir.
“Görünür, o, dövlət atributlarına hörmət etmir. Biz şəhidlərimizi o bayrağa bürüyüb dəfn edərək matəm tuturuq”.
“Bəs nə üçün bu cür hallar baş verir?” – vəkil Ə. Mustafayev sual edir.
"Azərbaycan qanunvericiliyində dövlət atributlarından istifadə qaydaları var. Bəziləri bayrağı maşınına bürüyür və ya sancır, müxtəlif yerlərdə saxlayırlar. Bu da pozuntulara gətirib çıxarır. Bayrağa dərin hörmət hissini öldürür".
Ekspert mətbuatda bu barədə maarifləndirmə və qınaq kampaniyasının aparılmasının vacibliyini də vurğulayıb. O, belə hərəkətə yol verən insanların tərbiyəvi və qabaqlayıcı tədbir olaraq cəzalandırılmasını tələb etmək lazım olduğunu da deyib.
Qeyd edək ki, yayılan videogörüntü əsasında Daxili İşlər Nazirliyindən bildirilib ki, polis əməkdaşları tərəfindən həyata keçirilmiş əməliyyat texniki tədbirlərlə həmin şəxsin Sumqayıt şəhər sakini 72 yaşlı Soltan Mehdiyev olması müəyyən edilib. Sumqayıt Şəhər Polis İdarəsinə dəvət olunan Soltan Mehdiyev izahatında taksi fəaliyyəti ilə məşğul olduğunu bildirib. O qeyd edib ki, avtomobilində təmizlik üçün bir neçə parça olub, lakin həmin vaxt səhv salaraq həmin parçalardan deyil, bayraqdan istifadə edib. S.Mehdiyev etdiyi bu hərəkəti qınayan hər bir kəsdən üzr istəyib və peşman olduğunu bildirib.
Gülnar Səlimova