"Dünən bağçada baş verən hadisə hər birimizdə ruh düşkünlüyü, eyni zamanda narahatlıq yaratdı. Təəssüflər olsun ki, bu kimi hallar hər gün baş verir, amma bəziləri gizlədilir, bəziləri də kimlərsə tərəfindən yaxşı ki, bu cür işıqlandırılır".
Bu fikirləri EDNews.net-ə təhsil üzrə ekspert Elçin Əfəndi səsləndirib. Ekspert açıqlamasında bildirib ki, hər bir təlim-tərbiyə müəssisəsində istər rəhbər, istərsə də pedoqoji heyət işə götürülən zaman psixoloji imtahan verməlidir.
"Hər işçinin psixoloji durumu eyni deyil. Ona görə də aidiyyatı qurumlar həmin şəxsləri işlə təmin edərkən onların psixoloji testdən keçirməlidirlər. Yaxşı olar ki, bütün təlim-tərbiyə müəssisələrində - uşaq evləri, məktəbəqədər hazırlıq qrupları, bağçalar və s. hər birinin auditoriyasında xüsusi video görüntülər qeydə alınmalıdır və o görüntüləri birbaşa valideynlərin izləmək imkanları olmalıdır. Belə halda bu kimi neqativ halların qarşısını ala bilərik. Bilirsiniz ki, bağçalar artıq Təhsil Nazirlinin tabeliyinə verildi və yaxın aylarda artıq bu istiqamətdə Nazirlik tərəfindən müvafiq işlər görüləcək".
Bundan başqa mütəxəssis bildirib ki, cəmiyyətdə burada xüsusi rol oynamalıdır. Bu cür insanlara rast gəldikdə onları ictimai qınağa cəlb etməlidirlər ki, başqalarına da dərs olsun.
“Çünki başına qapaz vurularaq böyüdülən uşaq cəmiyyət üçün normal insan olmayacaq. Sabah o uşaq öz haqqını tələb etməyə də qorxacaq. Biz əksinə elə etməliyik ki, o uşaqlar fərd olaraq böyüsün. Belə isə onlar qapazaltı böyüdülür və bu cür gənclikdək nəsə ummaq olmayacaq”.
Qeyd edək ki, məsələ ilə bağlı Təhsil Nazirliyi uşağa qarşı şiddət göstərən tərbiyəçi Baxışova Zülfiyyəni işdən azad edib. Nazirlik uşaqlara qarşı zorakılıq hallarının baş verməsini qətiyyətlə pisləyir və bunun yolverilməz olduğunu vurğulayır.
Hadisə ilə bağlı araşdırma başladılıb.
Gülnar Səlimova