“Tağıyevin heykəlinə xəsarət yetirənlər rusbaşlardır. Kim edib bilmirəm, amma bu cinayəti edənlər ancaq Azərbaycan xalqının düşməni ola bilər”.
Bu sözləri Ednews-a açıqlaması zamanı Tibb Universitetinin dosenti, tanınmış ictimai xadim Rəşid Mahmudov Hacı Zeynaladbin Tağıyevin abidəsinə yetirilən xəsarətdən danışarkən deyib. O, həmçinin qeyd edib ki, Hacı Zeynalabdin Tağıyev Azərbaycan xalqının simasıdır.
“Hacı hələ 1901-ci ildə Bakıda müsəlman qızlar üçün ilk məktəbi açıb. O, təkcə Azərbaycanda tanınmayıb. Həmin o dövrlərdə Pakistanda ölümcül virus yayılıb. İnsanlar məhv olub, şəhərlər isə tamamilə boş qalıb. Belə bir zamanda qardaş xalqın köməyinə Hacı Zeynalabdin çatıb, Azərbaycandan ora pulsuz vaksin göndərib. Bunun sayəsində bütün pakistanlılar Azərbaycana bu gündə minnətdardır. Hətta Tağıyevin bu addımı haqqında Pakistanda orta məktəb kitablarında məlumat var. Bu səbəbdən Azərbaycanın çətin günlərində ilk yardım edənlərdən biri də Pakistan dövləti oldu”.
Sonda öz məyusluğunu dilə gətirən Rəşid Mahmudov fikrini bu sözlərlə tamamlayıb.
“Təəssüflər olsun ki, bütün Pakistandan fərqli olaraq, azərbaycanlılar hələ də Tağıyevi tanımı”.
Xatırladaq ki, ötən gün Prezident İlham Əliyevin açılışını etdiyi Bakı milyonçusu, xeyriyyəçisi Hacı Zeynalabdin Tağıyevin heykəlinə elə həmin gecə naməlum şəxslər tərəfindən xəsarət yetirilib. Bu səbəblə Səbail Rayon Polis İdarəsi (RPİ) əməkdaşları tərəfindən həyata keçirilən əməliyyat-axtarış tədbirləri nəticəsində əməli törətməkdə şübhəli bilinən şəxslər – 1991-ci il təvəllüdlü Vüqar Tağızadə, 1996-cı il təvəllüdlü Allahverdi Məmmədli ilə müəyyən olunaraq saxlanılıb.
Qeyd edək ki, verilən məlumata görə, Tağıyevin abidəsindən qoparılan element heykəltaraş, Xalq rəssamı Xanlar Əhmədovun iştirakı ilə yerinə bərpa edilib.
Gülnar Səlimova
