Goranboy rayonunun Tapqaraqoyunlu kəndində 1996-cı il təvəllüdlü Məmmədov Vüqar Maqsud oğlunun minaya düşməsindən dərhal sonra Beynəlxalq Avrasiya Mətbuat Fondunun (BAMF) Regional koordinatorları Məmmədzadə Vidadi, Yusifov Vüqar və BAMF-ın İcma Mina Aksiyası komandasının məsul şəxsi Mirzəyev Babək hadisə yerinə gedərək vəziyyətlə tanış olub və lazimi qeydlər aparıblar.

EDNews.net-in məlumatına görə, BAMF əməkdaşları yaralanan kənd sakinini Goranboy rayon xəstəxanasında ziyarət ediblər.

Araşdırma zamanı məlum olub ki, Vüqar Məmmədov gündəlik təsərrüfat işləri ilə məşğul olan zaman minaya düşüb. Nəticədə onun sol ayağı amputasiya olunub. 

Faktla bağlı Goranboy Rayon Prokurorluğunda araşdırma aparılır.

Yenidən təhlükəsizlik qaydalarına daha dəqiq riayət etmələri üçün Avropa İttifaqının maliyyə yardımı, UNICEF-in Azərbaycandakı nümayəndəliyinin və Azərbaycan Respublikasının Minatəmizləmə Agentliyinin (ANAMA) dəstəyi ilə Beynəlxalq Avrasiya Mətbuat Fondunun (BAMF) həyata keçirdiyi “Partlayıcı sursatların təhlükəsinə dair maarifləndirmə” (PSTM) layihəsi çərçivəsində hadisə baş verən kənddə geniş maarifləndirmə tədbirləri həyata keçirilib.

Maarifləndirmə layihəsinin həyata keçirilməsində əsas məqsəd mina və digər partlayıcı sursatların təsirinə məruz qalan və ya qalması ehtimal olunan sakinlərin mina problemi barədə məlumatlılıq səviyyəsinin artırılması, onları təhlükəsiz davranışa təşviq etməklə risklərin azaldılması olub.

Qeyd edək ki, yanvarın 18-də Goranboy rayonunun Tapqaraqoyunlu kəndində Məmmədov Vüqar Maqsud oğlu təhlükəli hesab edilən keçmiş təmas xətti ərazisi istiqamətində hərəkət edərkən mina partlayışı nəticəsində xəsarət alıb. Baş verən piyada əleyhinə mina partlayışı nəticəsində kənd sakininin sol ayağı dizdən aşağı amputasiya olunub.

ANAMA-nın İctimaiyyətlə əlaqələr və mətbuatla iş şöbəsi bildirib ki, Agentlik tərəfindən Goranboy və müharibədən zərər çəkmiş digər rayonlarda mütəmadi olaraq mina və partlayıcı qurğuların təhlükəsinə dair maarifləndirmə fəaliyyəti icra edilir. Baş verə biləcək bədbəxt hadisələrin qarşısını almaq məqsədilə mina təhlükəsi ilə mübarizə istiqamətində genişmiqyaslı tədbirlərin həyata keçirilməsi üçün kəndlərdə icma qrupları yaradılır. İcma qruplarının fəaliyyətinin əsas məqsədi mina təhlükəsinə dair kənd sakinlərini, fərdi sahibkarlıq, kənd təsərrüfatı fəaliyyəti ilə məşğul olan sakinlərin təhlükəli ərazilər, partlayıcı sursatların törədə biləcəyi risklər barədə maarifləndirilməsi, İcma Komitələrinin yaradılması, rayon icra strukturları ilə əlaqələndirilməsi, son məlumatların ANAMA-da toplanılmasının təmin edilməsindən ibarətdir.

ANAMA bir daha vətəndaşlarımıza müraciət edərək icazəsiz səfərlərdən çəkinməyə, təhlükəli və şübhəli ərazilərə daxil olmamağa, rastlaşdıqları naməlum əşyalara toxunmamağa çağırır.

• Tag:
• mina
• BAMF
• Goranboy
• sakin