Bakının "Şuşa" KVN klubu Rusiyanın Soçi şəhərində keçirilən "KİVİN-2022" festivalında ikinci tura yüksəlib.
Buna baxmayaraq, Azərbaycanlı izləyicilər komandanın uğuruna ürəkdən sevinə bilməyib. Səbəb isə komandamızın ikinci tura yüksəldikdən sonra festivalın rəsmi saytında "Şuşa" deyil, "Buta" adı ilə qeyd edilməsi olub.
Sosial şəbəkələrdə komandamızın adının təşkilatçıların təzyiqindən sonra dəyişdiyi bildirilib.
Bu, vətəndaşlar arasında böyük narazılıq yaradıb. Komandanın rəhbəri məşhur ssenarist və prodüser Müşviq Abbasov tənqid edilib.
Qeyd edək ki, festivalda iştirak edən erməni komandası “Ararat” adı altında çıxış edir.
Məsələ ilə bağlı ilk olaraq, uzun illər Azərbaycanı ölkə hüdudlarında layiqli təmsil edən “Bakılı oğlanlar” komandasının əsas simalarından biri, əməkdar artist Bəhram Bağırzadəyə müraciət etik. EDNews-un ünvanladığı suala məşhur KVN-çi cavab olaraq bildirib ki, bunu ilk olaraq komandanın rəhbəri Müşfiq Abbasovdan soruşmaq lazımdır.
“Mən 2000-ci ildə “Əsrin çempionu” olmuşam. Dediyiniz məsələ ilə bağlı sualı isə komandanın rəhbəri Müşfiq Abbasova vermək lazımdır”.
Milli Məclisin Mədəniyyət komitəsinin sədr müavini, deputat Fazil Mustafa sözügedən məsələ ilə bağlı açıqlamasında komandanın adının belə formada dəyişdirilməsinin çox yanlış bir addım olduğunu deyib.
“Mənim fikrimcə, komandanın adı dəyişdirilməməli idi. Ən azından iştirakdan imtina etməyi göz önünə almaq olardı. Əgər ermənilər komandalarının adını dəyişmirsə deməli məsələ qarşılıqlı hansısa bir şəkildə həll edilə bilərdi. Erməni komandanın “Ararat” adını dəyişməsi daha vacibdir, çünki bu Türkiyəyə qarşı yönələn bir addımdır. Amma Şuşa Azərbaycan şəhəridir və bununla bağlı bir problem yoxdur".
Millət vəkili həmçinin vurğulayıb ki, “Şuşa” adının dəyişdirilməsi həm siyasi, həm də ümumiyyətlə mənəvi cəhətdən doğru addım deyil.
"KVN-çilər milləti təmsil edən insanlardır. Mən onların zəhmətini və yaxud əziyyətini yerə vurmağın tərəfdarı da deyiləm. Buna qarşı xüsusi kampaniya aparmağı da doğru hesab etmirəm. Amma gərək burada müvafiq qurumlarla məsləhətləşərdilər. İnanmıram ki, bu özbaşına edilsin. Yəqin ki, hansısa qurum bu tapşırığı verib. O tapşırıq verənin məsuliyyət məsələsinə baxmaq olar ki, bu siyasi cəhətdən nə qədər naşı bir addımdır”.
Qeyd edək ki, məsələ ilə bağlı “Buta” KVN komandasının rəhbəri ssenarist, prodüser Müşfiq Abbasov yerli mətbuata açıqlamasında bildirib ki, hazırda bu barədə heç bir söz deyə bilməyəcək, çünki bu nəticələrə təsir edə bilər. O, onu qınayanlara səslənərək bir az səbr etmələrini istəyib. Prodüser tezliklə qalmaqal haqqında ictimaiyyətə açıqlama verəcəyini bildirib”.
Gülnar Səlimova
