Son zamanlar şəhərdə artan qanunsuz parklanma yerləri vətəndaşlara böyük çətinliklər yaradır. Bununla bağlı isə şikayətlər durmadan artır. Çünki əksər yerlərdə parklanma ərazilərinin müəyyən edilməməsi qanunsuzluq hallarına yol açır. Yaranmış boşluqlardan isə ən sərfəli qazancı işbazlar qazanırlar.
Məsələ geniş vüsət aldığı üçün Bakı şəhər Dövlət Yol Polisi İdarəsini də hərəkətə keçirib. Bu səbəblə bu gündən etibarən şəhərdə parklanma ilə bağlı reydlərə başlanılıb.
Parklanma məsələsində yaranmış problemlərlə bağlı Ednews-a danışan nəqliyyat eksperti Eldəniz Cəfərov isə düşünür ki, bu işə daha ciddi yanaşılmalıdır.
O, həmçinin qeyd edib ki, əvvəllər parklanma Bakı Şəhəri İcra Hakimiyyətinin səlahiyyətində olub, daha sonra isə bu, Bakı Nəqliyyat Agentliyinin (BNA) icraatına verilib.
“O zamanlar bunun üçün hətta parkomatlar da quraşdırıldı və qiymət olaraq bir saat üçün 50 qəpik təyin edildi. Qeyd edim ki, ilk 15 dəqiqə ödənişsiz idi. Ümumiyyətlə, Azərbaycanda istər pullu, istərsə pulsuz, dövlətin balansında olan və ya özəl parklanma yerlərində qoyulan müddətin ilk 15 dəqiqəsi pulsuzdur. Bu məcburi və icbari bir qərardır. Hər bir parklanma sahibi buna əməl etməlidir. Və elə parklanma yeri var ki, ilk yarım saatı pulsuz edir”.
Ekspertin sözlərinə görə, bir müddət parklanma yerlərində boşluqlar vardı. BNA rəsmi olaraq elan etdi ki, parklama yerləri ilə bağlı tariflər hələ müəyyən edilməyib və buna görə bu yerlər hələ ki, pulsuzdur.
“Bu əlbəttə ki, məntiqli bir cavabdır. İstərdim ki, ümumiyyətlə, Bakı şəhərinin müxtəlif yerlərində parklanma üçün ödəniş alınmasın. Xüsusən də ekoloji təmiz avtomobillər və mühərrik həcmi kiçik olan avtomobillər üçün park yerləri daha ucuz olsun. Parklanma yerlərinin müəyyən edilməməsi məsələsi indiyədək qalır. Artıq neçə ildir ki, Bakı şəhərində parklanma tarifləri müəyyən edilməyib. Görünür, bunun da hansısa obyektiv və subyektiv səbəbləri var. Bəlkə də hələ dəqiq təsdiqlənməyib. Fikrimcə, təkif olunan tariflər yüksək olduğu üçün hökumət tərəfindən qəbul edilməyib. BNA hökumətə tariflərlə bağlı verdiyi təklifləri və parklanma üçün bölünən ərazilərlə bağlı ictimaiyyətə açıqlama verməlidir ki, cəmiyyətdə də məsələ ilə bağlı konkret fikir formalaşsın”.
E. Cəfərov həmçinin bildirib ki, problemin həll edilməsi üçün Bakı şəhərinin balansında olan parklanma yerlərinin ünvanları və xəritəsi açıqlanmalıdır.
“Hər bir sürücünün avtomobilini harada saxlaması haqqında məlumatı olmalıdır. Onlar bunu bilsə avtomobillərini rahat bir şəkildə parklanma yerində saxlasalar, əlbəttə heç kim qanunsuz hərəkət etməz. Həmçinin, bu, piyadalar üçün də müsbət təsir edə bilər. Taksi xidmətindən istifadə edən sərnişinlər da həmin parklanma yerinə gəlib taksini ordan sifariş edə bilərlər. Taksi sürücüləri də biləcək ki, dövlətin parklanma yerləri Bakı şəhərinin hansı yerində yerləşir. Bu yerlərin inzibati, rəqəmsal xəritəsi olmalıdır ki, vətəndaşlar da rahat avtomobillərini orda saxlasın. Xəritə tərtib olunsun və lazımdırsa bu yerlərin inzibati, rəqəmsal xəritəsi olsun, vətəndaşlar da rahat avtomobillərini orda saxlasın Beləlliklə, Bakı şəhərində nizam-intizam yaranacaq, bu xaos itəcək. Bunu etmək asandır və proses artıq başlayıb”.
Ekspert əlavə edib ki, Azərbaycan Respublikasında yol hərəkətinin təhlükəsizliyinə dair 2019-23cü illəri əhatə edən Dövlət Proqramında parklanma məsələləri əsas prioritet kimi götürülüb.
"Ümid edirəm ki, 2023-cü ilə qədər parklanma məsələlərinin həllini görəcəyik”.
Gülnar Səlimova
