“İşıq pulları məmurların ciblərinə axır, nəticədə küçələr zülmətə bürünür” - Elməddin Muradlıdan SƏRT SÖZLƏR - ednews.net

21 May, Şənbə

(+994 50) 229-39-11

“İşıq pulları məmurların ciblərinə axır, nəticədə küçələr zülmətə bürünür” - Elməddin Muradlıdan SƏRT SÖZLƏR

Cəmiyyət A- A A+

“Neçə ildir parklanma adı altında camaatın gözü qarşısında alver gedir. Hamı da onun arxasında kimlərin dayandığını çox gözəl bilir. Biz bir daha, bu işin necə böyük qruplaşma tərəfindən həyata keçirildiyinin bir daha şahidi olduq. Bir gecənin içində düyməni necə basdılarsa, o 600 nəfərdən artıq “parkovşik” yoxa çıxdı. Siz bu gün istəsəniz altı nəfəri bir yerə yığa bilməzsiniz. Amma görün bunlar necə böyük mafiadır ki, bir gecənin içində 600-700 nəfərin hamısına göstəriş verdilər ki, sabah əraziyə heç kim çıxmasın”.

Bu sözləri Ednews-a nəqliyyat eksperti, Daxili İşlər Nazirliyi yanında İctimai Şuranın üzvü Elməddin Muradlı qanunsuz parklanmaya qarşı başladılan reydlərdən danışarkən deyib. O, qeyd edib ki, keçirilən reydlər zamanı nəzarətçilərin heç biri ərazidə olmayıb.

“Onlara xüsusi olaraq xəbərdarlıq edilib ki, səhər reydlər olacaq əraziyə getməyin. Bunu kimlərin idarə etdiyini də çox yaxşı bilirik. Hətta BNA bu haqda bir video yayımlamışdı. Videoda nəzarətçilərin özləri açıq şəkildə kimə, niyə, nə vaxt pul verdiklərini etiraf edirlər. Bunu axtarıb tapmaq elə də çətin məsələ deyil. Polis indi mübarizə tədbirlərinə başlayıb. Mən istərdim ki, bu davamlı olsun”.

Söhbət əsnasında E. Muradlı digər bir problemə də toxunub. O, yol hərəkəti təhlükəsizliyinə ayrılan pulların rüşvətxor məmurlar tərəfindən mənimsənildiyini və görülən işlərin başdansovdu görüldüyünü də deyib. Onun sözlərinə görə isə bu problem insanların həyatına təhlükə saçır.

“Əgər sən yol hərəkəti təhlükəsizliyi üçün ayrılan vəsaiti mənimsəyirsənsə, inan sabah sənin balan elə o yolda öləcək. Ona əmin ol. Asfalt keyfiyyətli çəkilmir, küçə qəsdən işıqlandırılmır və insanlar qəzaya düşürlər. Süpürgəçi qadınlar əsasən səhər saatlarında vurulur, çünki bu zaman küçələrin işıqları söndürülür. Qəzalar da əsasən bu səbəblə baş verir”.

Ekspert hətta işıq pullarının da rüşvətxor məmurların cibinə axdığını vurğulayıb.

“Necə olur ki, enerjini bizdən alan Gürcüstan küçələrində bütün gecəni işıq yanır, Azərbaycanda isə gecə 00:00-dən sonra küçələr zülmətə bürünür. Görün gecə saat 00:00-dən sonra respublikada nə qədər yol nəqliyyat hadisəsi, piyada vurma baş verir. Bunları dəyərləndirmək lazımdır. Bu acgöz məmurlar insan həyatlarını heçə sayıb, ancaq ciblərini düşünürlər”.

Xatırladaq ki, Bakı şəhər Dövlət Yol Polisi İdarəsi ölkə ərazisində qanunsuz parklanmaya qarşı reydlərə başlayıb. Reyd zamanı bir neçə nəzarətçi saxlanılıb.

Qeyd edək ki, bu tədbirlər son zamanlar avtomobillərin dayanma-durma və parklanması ilə bağlı insanların şikayətləri əsasında görülür. Əksər yerlərdə parklanma ərazilərinin müəyyən edilməməsi qanunsuzluq hallarına yol açır. Yaranmış boşluqlardan isə ən sərfəli qazancı işbazlar qazanırlar.

Gülnar Səlimova

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...