Azərbaycanda dini qurumlar ianə edilmiş pul vəsaitlərini plastik kart və elektron ödəmə sistemləri vasitəsilə qəbul edəcək. Bu, “Dini etiqad azadlığı haqqında” qanunun 18-ci maddəsinə təklif olunan dəyişiklik layihəsində əksini tapıb.
Görünür, məscid və ziyarətgahlarda quraşdırılan nəzir qutularına yığılan vəsaitlə bağlı cəmiyyətdə müxtəlif fikirlərin formalaşması belə bir dəyişikliyə rəvac verib.
Mövzü ilə bağlı Ednews Milli Cəbhə Partiyasının sədri Razi Nurullayevin fikirlərini öyrənib.
R. Nurullayev açıqlaması zamanı bildirib ki, bu gün Azərbaycanda nəzir qutularından daha vacib sahələr var. Onun sözlərinə görə, nəzir qutularından yığılan pulların monitorinqini aparmaq və şəffaflaşdırmaq üçün qanunvericilik səviyyəsində müzakirə olunmasına ehtiyac yoxdur.
“Bu gün hətta dövlət tərəfindən müəyyən dəstək göstərilsə də məscidlərin saxlanılmasına kifayət etmir. İşıq, qaz pulunu belə dövlət ödəyir. Nəzir qutusunda yığılan 300-500 manat heç məscidin bir nəfər işçisinin əmək haqqı və dolanışığı deyil. Amma cəmiyyətdə belə bir fikir var ki, nəzir qutularında yığılan pullar hara getdi. Sanki milyonlar, yüz minlər yığılır orda”.
Partiya sədri nəzir qutularına yığılan vəsaitin az olduğunu deyib.
“Bir neçə məscidin axundu ilə danışmışam və görmüşəm ki, ora çox cüzi miqdarda pul yığılır. Məscidə kənardan gələnlər tərəfindən köməkliklər olmasa onlar özünü heç saxlaya bilməz. Dövlət də onun bir çox xərclərini artıq öz üzərinə götürüb. Ona görə cəmiyyətdə narazı insanların məsələləri qaldırmaq üçün ödənişlərin onlayn olmasına etiraz etmirəm, amma onun həyata keçmə mexanizmi çox çətindir. Çünki inanmıram ki, bu gün insanlar nəzir qutusuna 1 manatı bu vasitəylə ödəmək istəsin. Bununla bağlı insanlarımızın psixologiyasına da nəzər salsaq, düşünəcəklər ki, mən məscidə onlayn ödəyirəmsə bundan Allahın xəbəri olmayacaq. O məscidin qabağında dua edib nəzir qutusuna pul atanda əmin olur ki, Allah onun dualarını eşidəcək. Bu baxımdan burada psixoloji məqamlar və mənəvi tərəflər də var”.
Millət vəkili digər dinlərin ibadət yerlərində də bu məsələ ilə bağlı məqama toxunub.
“Başa düşə bilmirəm ki, nəyə görə, Azərbaycanda insanlar din xadimlərini kasıb görmək istəyir? Bütün dünyada kilsələr, inanc yerləri çox varlıdırlar. Özlərinin böyük əraziləri, torpaqları, mülkləri var. Kilsələrə gələnlər böyük məbləğdə ianələr edir. Həmçinin kilsənin tərkibində böyük fondu fəaliyyət göstərir. Amma onların insanı buna pis baxmır. Kilsələr hər zaman varlı olublar. Bəs, nə üçün Azərbaycanda din xadimlərini, axundları, mollaları kasıb, acından ölən görmək istəyirlər? Fikrimcə, məscidlərin, din adamlarının varlı olmasında qəbahət yoxdur. Məscidə daha çox pul yığılarsa və məscid varlı olarsa daha yaxşı olar. Mən də istərdim ki, bu məsələ şəffaf olsun, öz “Facebook”, “Twitter” və veb səhifəsini yaratsınlar və yaxud o kitabda bütün gələn-gedən, ianə verənlərin hamısı qeyd olunsun ki, proses şəffaf olsun. Bilirəm ki, Allah Təala da şəffaflığı sevir və din xadimləri də bu şəffaflığa, düzlüyə etiraz etməzlər”.
Gülnar Səlimova