Ekspertlərin fikrincə, qadın sürücülər yol hərəkəti qaydalarına daha yaxşı riayət edir. Bu onların yollarda daha diqqətli və ehtiyatlı avtomobil idarə etmələrindən irəli gəlir.
Bəs, əslində zərif cinsin nümayəndələri daha təcrübəli kişi sürücülərlə müqayisədə yol hərəkəti qaydalarına riayət etməkdə necə fərqlənirlər?
Qadın, yoxsa kişi sürücülər daha intizamlıdır?
Nəqliyyat məsələləri üzrə ekspert Fərhad Eyyubov bildirib ki, Azərbaycanda şəxsi istifadədə olan nəqliyyat vasitələrinin təqribən 10-15 faizi qadın sürücülərin payına düşür. O, bu barədə Ednews-a danışarkən deyib.
"Bundan əlavə, peşəkar sürücülərin hamısı kişilərdir. Faiz nisbətinə görə götürdükdə isə yol nəqliyyat hadisələrinin əksəriyyəti kişilərin üzərinə düşür. Amma hər bir qadın və ya kişinin hərəkəti müddətində nə qədər yol nəqliyyat hadisəsi törətdiyi bir qədər müəmmalı məsələdir".
Ekspert həmçinin bunun cinsindən asılı olmayaraq, hər bir sürücünün məsuliyyətindən asılığı olduğunu vurğulayıb.
"Statistikaya görə, dağ rayonlarında və çətin şəraiti olan yerlərdə qəzalar daha az olur, çünki sürücü həmin yollarda daha məsuliyyətli və diqqətli olur. Elə ki, sürücü hiss edir onun üçün şərait yaxşıdır, bir qədər məsuliyyətdən uzaqlaşır. Bu baxımdan deyə bilərəm ki, qadınlar bu məsələdə daha məsuliyyətli olurlar, çünki onlar müəyyən peşəkarlıq səviyyəsinə çatmaq üçün daha çox çalışırlar".
Lakin mütəxəssis bir məsələyədə aydınlıq gətirib. O, deyib ki, təcrübəsizlikdən təbii olaraq, qadınların pozduğu yol qaydalarının sayı və ya hərəkətdə olan nizamsızlıq halları faiz hesabı ilə daha çox da ola bilər.
"Bu nöqteyi-nəzərdən qadınlar daha məsuliyyətli olmalıdırlar. Amma bəzən qadınların yol hərəkəti qaydalarını pozmasında kişilərin də rolu olur. Kişilər onlara müəyyən qədər şərait yaratmalıdırlar. Bəzi kişilər sürücünün qadın olduğunu görəndə, ona maneəçilik yaratmağa çalışır, sürəti artırır, yaxud təhlükəli manevrlər edir. Qadın sürücülər də bu zaman müəyyən narahatlıq keçirirlər və təcrübəsizlikdən yol hərəkəti qaydalarını pozmağa məcbur olurlar".
Statistikaya gəldikdə isə...
Ekspert bildirir ki, bununla bağlı heç bir araşdırma aparılmayıb.
"Qadın, yoxsa kişi sürücülərin daha çox yol nəqliyyat qaydalarını pozması ilə bağlı statistika aparılmayıb. Fikirlər var ki, qadınlar kişilərə nisbətən bir az təcrübəsizdir, kişilərlə müqayisədə manevr və reaksiya müddəti bir qədər aşağıdır. Amma hesab edirəm ki, getdikcə qadınların təcrübəsi artır. Həqiqətən də yolda həm qadın, həm kişi sürücü eyni zamanda hərəkətdə olarkən, bu, daha maraqlı görünür. Əksinə, kişi sürücülər bir az da qadınlara görə məsuliyyət hiss etməlidirlər".
Fərhad Eyyubovun fikrincə, gələcəkdə qadın sürücülər daha təcrübəli olacaq.
"Hazırda müasir avtomobillərdə müəyyən mexaniki transmissiya və çətinlik törədən konstruksiyalar yoxdur. Bu da qadınlara avtomobili daha rahat idarə etməkdə çox kömək olur”.
Gülnar Səlimova
