“Bu gün Azərbaycanda nəzərəçarpan inkişafa nail olunması ictimai və dövlət maraqlarının xalq tərəfindən müdafiə edilməsinin nəticəsidir. Bu inkişafı həzm edə bilməyən qüvvələr daxili sabitliyi pozub, inkişafın qarşısını almağa çalışırlar. Hər hansı bir siyasətçinin öz xüsusi maraqlarını başqalarına yeritməklə şəxsi istəyini reallaşdırma cəhdi isə yolverilməzdir. Bu addım nəinki hakimiyyət və ya siyasi qüvvələr tərəfindən, həmçinin, bütün cəmiyyət tərəfindən qəbul edilmir, qınaqla qarşılanır. Bu günlərdə AMEA rəhbəri Ramiz Mehdiyevin açıqlaması məhz bu qəbildəndir”.
Bunu açıqlamasında deputat Müşfiq Məmmədli deyib. Deputat təəssüf hissi ilə qeyd edib ki, vaxtı ilə dövlətin üst səviyyəsində təmsil olunan, uzun illər siyasi təcrübəyə malik bir şəxsin hakimiyyətin vacib sütünu olan parlamentə çamur atması, öz ambisiyalarını həyata keçirmək niyyəti ümumilikdə cəmiyyət tərəfindən hiddətlə qarşılanıb.
“İlham Əliyev Azərbaycanı müasir, inkişaf edən və gələcəkdə inkişaf etmiş ölkəyə çevirmək üçün şərəfli missiyanı yerinə yetirir. Tariximizin şanlı dövrünü yaşadığımız vaxtda Ramiz Mehdiyev elmdən kənar, ürəkbulandıran yazıları ilə özünə səngər düzəltdiyi AMEA saytında çıxışlar edir, elm məbədinin platformasından siyasi məqsədlərini reallaşdırır. Siyasi polemika sağlam prinsiplər və dəyərlər üzərində qurulmalı olduğu halda Ramiz Ənvəroviç qaydaları pozur özünəməxsus etikadan kənar metoduna əl atır”.
Deputat həmçinin qeyd edib ki, cənab Prezident İlham Əliyevin ən yaxın silahdaşı olaraq Birinci vitse-prezident Mehriban Əliyevanın sosial, humanitar və iqtisadi siyasətin həyata keçirilməsində böyük əməyi var.
“Müasir Azərbaycanın inkişafında bu birlik mühüm əhəmiyyət kəsb edir. Prezidenti İlham Əliyev və birinci xanım Mehriban Əliyevanın sonuncu Ağcabədi və Ağdam rayonlarına etdikləri səfər regionçuluq və qohumabzlıq edənlərə, dövlətin imkanlarından istifadə edərək şəxsi mənfəətini güdən, digər dövlətlərin əlində alət olan şəxslərə verilmiş tutarlı cavabdır, möhtəşəm mesajdır! Eyni zamanda birbaşa ölkə rəhbərinin dünyada baş verən siyasi kataklizmlərdən, pandemiyanın yaratdığı ciddi problemlərdən dövlətimizi göz bəbəyi kimi qoruması danılmaz faktdır”.
Sonda deputat vurğulayıb ki, bu səbəblə də hər bir vətəndaş müstəqil dövlətçiliyimizin qorunması və daha da möhkəmlənməsi naminə şəxsi ambisiya və maraqlardan vaz keçməli , xalqın mənafeyinə və iradəsinə zidd intriqalara yol verməməlidir.
“Cəmiyyətin beynini zəhərləyən, onları cahələtə sürükləyən fikir və təhriklərdən uzaq durmalı, xoşbəxt gələcək və rifah naminə, eləcə də dövlətimizin varlığı uğrunda həmrəylik nümayiş etdirməlidir”.