Bu gün ölkəmiz milli teatrın yaranmasının 149-cu ildönümü qeyd edir.
Azərbaycanda teatrın əsası 1873-cü il martın 10-da Bakı realnı məktəbinin teatr həvəskarları truppası tərəfindən M.F.Axundzadənin “Sərgüzəşti-vəziri-xani Lənkəran” komediyasının nümayişi ilə qoyulub.
Ednews peşə bayramı günündə incəsənət xadimlərindən teatrımızın bugünkü vəziyyəti ilə bağlı fikirlərini öyrənib.
Xalq artisti, Dövlət Musiqili Teatrının aktrisası Afaq Bəşirqızı teatrın cəmiyyətdə hərəkətverici qüvvə olaraq ali funksiyasını yerinə yetirməsi üçün mütləq yaradıcı potensialı güclü olan adamların lazım olduğunu deyib: “Teatrda yüksək və ya ortabab səviyyəyə malik insanların olması mümkün deyil. Teatrda hər şey ali səviyyədə olmalıdır”.
Bu gün teatrın vəziyyətinin çətin olduğunu deyən aktrisa hər bir yaradıcı insanın mədəniyyəti yaşatmaq üçün çalışmalı olduğunu vurğulayıb.
“Fərqi yoxdur onu geniş tamaşaçı kütləsi tanıyır ya yox, əgər sənət üçün nəsə etsə, illər sonra bu gün yaddaşlarda qalmayan aktyor gələcəkdə tanınmış bir aktyor olacaq, teatr onu tarixə salacaq. Burada söhbət təkcə aktyordan getmir, hər bir insan işinə vicdanla yanaşmalıdır. Bu yaxınlarda efirdə Gənc Tamaşaçılar Teatrının bir tamaşasında aktrisa tək oynayırdı, xoşuma gəldi. Bizim Musiqili Teatrımız İrana qastrol səfərində çox gözəl bir tamaşa səhnəyə qoyub. Cənnət xanıma təşəkkürümü bildirirəm. Şəhid analarına həsr olunmuş kompozisiya tipində tamaşa idi. İranda çox böyük müvəffəqiyyətlə qəbul olunub. Hiss edirəm ki, aktyorun özündə arzu və həvəs olanda mütləq teatr özü də həvəslənir. Gəlib işi tez başa vurub 12-də çıxırsa o aktyor deyil”.
Afaq Bəşirqızı dövlət tərəfindən teatr xadimlərinə məişət problemlərindən tutmuş yaradıcı problemlərinə qədər hər zaman diqqət və qayğının göstərildiyini qeyd edib.
Xalq artisti, Azərbaycan Dövlət Milli Dram Teatrının aktyoru Kazım Abdullayev isə pandemiya ilə bağlı tamaşaçıların da teatr üçün çox darıxdığını bildirib: “Beş-altı aydır ki, teatr açılıb. Son oynadığımız tamaşa anşlaq idi, zalda demək olar ki, yer yox idi”.
Tanınmış aktyor deyir ki, COVID-19 pandemiyasından sonra vəziyyət bir az çətinləşib: “Aktyor işi elədir ki, gərək idmançı kimi həmişə məşqlərdə olasan. Akyor heyətinin yarısı demək olar ki, xəstəliklə əlaqədar işə çıxa bilmirdi. Mən özüm də xəstələnmişdim”.
Xalq artisti teatrlarda aktyorların maddi vəziyyətinin getdikcə yaxşılaşdığını deyib: “Bu gün bütün teatr cameəsinin bayramıdır. Teatr cəmiyyətin güzgüsüdür və bu gün münasibətilə mən də bütün tamaşaçılarımızı təbrik edir, uğurlar arzu edirəm”.
Gənc Tamaşaçılar Teatrının aktrisası Əməkdar artist Mehriban Abdullayeva isə pandemiya ilə bağlı çox zaman tamaşaçılarla ünsiyyətdə olmadığını dilə gətirib.
“Teatr bizim həyatımızdır, onsuz nəfəs ala bilmirik. Çox istərdim ki, tamaşaçılarımız o qaynar teatr günlərinə qayıtsınlar, zallarımız dolu olsun. Pandemiyadan öncə çox yaxşı idi. Tamaşaçı artıq teatrı sevməyə başlamışdı. Pandemiyadan sonra da belə bir hal ilə rastlaşıram ki, onlar internetdən, sosial şəbəkələrdən yorulublar və nəyisə canlı izləmək istəyirlər. Artıq tamaşaçıda teatra qəribə bir həvəs yaranıb. Bu da məni sevindirir. İstəyərdim ki, bu cür düşünən insanların sayı artın. Çünki teatr başqa bir aləmdir. Bu gənclərin inkişafı üçün də yaxşıdır. Bizim teatr həm uşaq və gənclərlə, həm də böyüklərlə ünsiyyətdə olan teatrdır, yəni bizim teatrla böyüyüb gəlib dram teatrına çıxırlar. Ancaq yeni nəsil teatrdan uzaqlaşıb, onun nə olduğunu hətta təsəvvür belə etmir. Bu isə təəssüf doğurur”.
Gülnar Səlimova